شارجہ(آن لائن) وقار یونس محمد عامر کی انٹرنیشنل کرکٹ میں جلد واپسی کی مخالفت کردی، وقار نے کہا کہ پیسر اپنی سزا پوری کرچکے لیکن انھیں کم از کم 2 ڈومیسٹک سیریز کھیلنے کے بعد ہی زیر غور لانا چاہیئے۔تفصیلات کے مطابق ہیڈ کوچ وقار یونس فاسٹ بولر محمد عامر کی ٹیم میں واپسی کے مخالف نہیں تاہم معاملے میں جلد بازی کو درست قرار نہیں دیتے، ایک انٹرویو میں انھوں نے کہاکہ فاسٹ بولر اپنی سزا پوری کرچکے ہیں،بلاشبہ انھوں نے2010 میں اسپاٹ فکسنگ اسکینڈل کی وجہ سے ہمیں دکھ پہنچایا تھا لیکن اس کا خمیازہ بھی بھگت چکے ہیں، سلاخوں کے پیچھے بھی رہے، ایک مسلمان کے طور پر بھی ہمیں سزا پوری کرنے والے کو معاف کرنا اور آگے کی طرف دیکھنا چاہیے۔مجھے بھی ان کے ساتھ کوئی مسئلہ نہیں لیکن قومی ٹیم میں واپسی کے لیے کسی جلد بازی کے حق میں نہیں ہوں، محمد عامر کو ڈومیسٹک مقابلوں میں شرکت کرنے دیں،کم از کم 2سیزنز سسٹم میں رہ کر پرفارم کرنے کا موقع فراہم کریں، پھر انٹرنیشنل کرکٹ کے لیے زیر غور لانا مناسب ہوگا۔