دبئی(نیوزڈیسک) یونس خان نے تمام سابق پاکستانی کرکٹرز کو پیچھے چھوڑ دیا،ایسا ریکارڈبناڈالا جو شائد عرصے تک کوئی توڑ نہ سکے،یونس خان جاوید میانداد کا ریکارڈ توڑ کر پاکستان کے سب سے زیادہ رنز بنانے والے بلے باز تو گزشتہ میچ ہی میں بن گئے تھے۔ مگر اب 9000 رنز کا سنگ میل عبور کر کے وہ دنیا کے چودھویں اور پاکستان کے پہلے 9000 رنز بنانے والے بلے باز بن گئے ہیں۔ پاکستان کی ایک سوتین ٹیسٹ میچ میں نمائندگی کرنے والے مڈل آرڈر بلے باز نے کیرئیر کی ایک سو چوراسی ویں اننگز میں نو ہزار رنز مکمل کیے۔یونس خان کو پاکستان کی طرف سے سب سے زیادہ تیس سنچریاں سکور کرنے کا اعزاز بھی حاصل ہے۔ سینتیس سالہ کرکٹر کا اگلا ہدف دس ہزار ٹیسٹ رنز کا ہے۔ یونس خان نے یہ ہدف حاصل کرتے ہی فوراً اللہ تعالیٰ کے حضور سجدہ شکر ادا کیا اور میدان میں موجود شائقین کا بلا اٹھا کر شکریہ ادا کیا جنہوں نے انہیں اپنی نشستوں سے کھڑے ہو کر داد دی۔