اسلام آباد(نیوز ڈیسک) بھارتی بورڈ پاکستانی کرکٹ کو تباہ کرنے پر تل گیا، پی ایس ایل کی تاریخوں میں ایشیا کپ کے انعقاد کا اعلان ہوتے ہی حکام کی نیندیں اڑ گئیں۔
تفصیلات کے مطابق سیکریٹری بی سی سی آئی انوراگ ٹھاکر نے گذشتہ دنوں کہاکہ ٹوئنٹی20ایشیا کپ کا انعقاد فروری کے وسط میں ہوگا، دلچسپ بات یہ ہے کہ4 سے 24 فروری تک پاکستان یو اے ای میں اپنی سپرلیگ کرانے کا پہلے ہی اعلان کرچکا تھا،ذرائع نے بتایا کہ پی سی بی کو یقین ہے کہ یہ فیصلہ پی ایس ایل کو تباہ کرنے کیلیے کیا گیا، اگر ایشیا کپ ان تاریخوں میں ہوا تو پاکستانی ٹیم شرکت نہیں کر سکے گی۔
ساتھ ہی سری لنکن اور بنگلہ دیشی کھلاڑیوں کولیگ سے باہر رہنا پڑے گا، ایونٹ کے ساتھ ہی انٹرنیشنل کرکٹ ہونے سے براڈ کاسٹر اور اسپانسرز بھی شش وپنج کا شکار ہو سکتے ہیں،ذرائع نے مزید بتایا کہ بورڈ کو یہ بھی خدشہ ہے کہ کہیں بھارت آئی پی ایل میں شامل کھلاڑیوں کو پی ایس ایل میں شرکت سے نہ روک دے۔
دونوں ایونٹس کے معاوضوں میں بڑا فرق ہے، موجودہ حالات میں بڑے کھلاڑی پاکستانی ایونٹ میں شرکت سے بھارت کو ناراض کرنے کا خطرہ مول لینا نہیں چاہیں گے،ان تمام باتوں کو ذہن میں رکھتے ہوئے ہی پی سی بی حکام نے بھارتی بورڈ حکام سے ملاقات کی بھرپور کوششیں کیں مگر کامیابی نہ ملی، اسی طرح پی سی بی لیگ پر پانی کی طرح پیسہ بہا رہا ہے۔
آفیشلز چاہتے تھے کہ بھارت سے سیریز ہو جائے تاکہ خزانہ خالی نہ ہو، مگر اس منت سماجت کا کوئی فائدہ نہ ہوا، اب بورڈ کی تمام تر امیدیں اپنی لیگ سے وابستہ ہیں جسے بھارت کسی صورت کامیاب نہیں ہونے دینا چاہتا۔