دبئی (نیوزڈیسک)پاکستانی کرکٹ ٹیم کے لیگ سپنر یاسر شاہ نے کہاہے کہ انگلش بیٹسمینوں کی کمزوری سے فائدہ اٹھاو ں گا ۔ایک انٹرویو میں یاسر شاہ نے کہاکہ انھوں نے اس سیریز کےلئے بہت زیادہ محنت کر رکھی ہے تاہم پہلے ٹیسٹ میچ کمر کی تکلیف میں مبتلا ہوکر نہ کھیلنے کا انھیں بہت دکھ ہے۔اگر وہ ابوظہبی ٹیسٹ کھیلتے تو یقیناکامیاب ہوتے کیونکہ وہ وکٹ اگرچہ سست تھی تاہم چونکہ وہ دوسرے سپنروں کے مقابلے میں تیز گیندیں کرتے ہیں لہٰذا انھیں وکٹیں ملتیں۔یاسر شاہ کو پاکستان کی طرف سے ٹیسٹ کرکٹ میں سب سے کم ٹیسٹ میچوں میں وکٹوں کی نصف سنچری مکمل کرنے کا اعزاز حاصل ہے۔انھوں نے کہا کہ وہ باقاعدگی سے انگلش بیٹسمینوں کی وڈیوز دیکھتے آ رہے ہیں اور ان کی خامیوں کا جائزہ لیتے ہوئے اپنی بولنگ سے ان کے لیے مشکلات پیدا کرنے کی کوشش کریں گے۔یاسر شاہ نے کہا کہ ابوظہبی کے مقابلے میں دبئی کی وکٹ اسپنروں کے لیے زیادہ سازگار ہے اور انھیں یقین ہے کہ جس طرح انھوں نے آسٹریلیا اور نیوزی لینڈ کے خلاف عمدہ بولنگ کی تھی، اسی کارکردگی کا مظاہرہ وہ انگلینڈ کے خلاف بھی کریں گے۔یاسر شاہ نے کہاکہ وہ خود پر دباو ¿ محسوس نہیں کرتے لیکن یہ ضرور ہے کہ ہر کسی نے ان سے اس سیریز سے قبل ہی بے پناہ توقعات وابستہ کر رکھی تھیں اور ہر کوئی یہی کہتا تھا کہ یہ سیریز پاکستان کو یاسر ہی نے جتوانی ہے۔یاسر شاہ کہتے ہیں کہ بولنگ کوچ مشتاق احمد نے انھیں بولنگ کے بارے میں کئی اہم باتیں بتائی ہیں۔یاسر شاہ کے مطابق سری لنکا کے خلاف ٹیسٹ سیریز نے ان کے اعتماد میں بے پناہ اضافہ کیا۔