نئی دہلی (نیوزڈیسک)بھارتی کرکٹ ٹیم کے اسپنر امیت مشرا کو بنگلور کے مقامی ہوٹل میں خاتون کوزبانی اور جسمانی طورپر ہراساں کرنے کے جرم پر مقدمہ درج کر دیا گیا۔بھارتی میڈیا کے مطابق مذکورہ واقعہ 25ستمبر کو بنگلور کے ایک ہوٹل میں پیش آیا . خاتون نے 27 ستمبر کو ان کے خلاف مقدمہ درج کرایا اور مشرا کے خلاف ایف آئی آر بھی درج کی گئی ہے۔بنگلور پولیس نے مشرا کو سات یوم کے اندراندر تفتیشی آفیسر کے سامنے پیش ہونے کے لیے احکامات جاری کردیے ہیں۔اطلاعات کے مطابق خاتون مشرا کو پچھلے تین سال سے جانتی تھیں اور ان سے ملنے ہوٹل آئی تھیں۔بنگلور سینٹرل ڈویژن کے ڈپٹی کمشنر پولیس سندیپ پٹیل نے میڈیا کو بتایا کہ مشرا کے خلاف ایف آئی آر درج کی جاچکی ہے اور اس کی ایک کاپی بی سی سی آئی کو بھی بھیجی گئی ہے۔واضح رہے امیت مشرا کو پیر کے روز ہی جنوبی افریقہ کے خلاف اگلے ماہ سے شروع ہونے والی ٹیسٹ سیریز کے لیے ٹیم میں شامل کیا گیا تھا۔