ابو ظہبی(نیوزڈیسک) پاکستان کرکٹ ٹیم کے نامور شائق محمد زمان جو چاچا ٹی ٹوئنٹی کے نام سے بھی مشہور ہیں، نے مبینہ طور پر پاکستانی اوپنر احمد شہزاد کی بدتمیزی پر ان سے معافی طلب کی ہے۔میڈیا رپورٹ کے مطابق زمان کا کہنا ہے کہ اگر شہزاد نے ان سے معافی نہیں مانگی تو وہ دبئی میں انگلینڈ کے خلاف اگلے میچ کے دوران احتجاج کریں گے۔زمان نے بتایا کہ وہ ہوٹل میں اپنے میزبان کے بیٹے کے ساتھ موجود تھے کہ یہ واقعہ پیش آیا۔زمان کے مطابق ہم ہوٹل پاکستان کرکٹرز کو دیکھنے کے لیے گئے تھے اور کوشش تھی کہ ان کے ساتھ کچھ تصاویر لے سکیں۔انہوں نے بتایا کہ انہیں دیر ہوگئی تھی اور ہوٹل پہنچنے پر انہیں صرف شہزاد ہی نظر آئے جن سے انہوں نے تصویر کھنچوانے کی درخواست کی۔زمان نے کہا کہ اس پر احمد شہزاد نے ان سے بدتمیزی شروع کردی اور ہمیں چلے جانے کو کہا جبکہ سنگین نتائج کی دھمکیاں بھی دیں۔انہوں نے کہا کہ وہ پاکستانی ٹیم سے محبت کرتے ہیں اور کھیل کے شوقین ہونے کے باعث پاکستانی ٹیم کی ہر جگہ سپورٹ کرتے ہیں تاہم ان کی حوصلہ افزائی کرنے کے بجائے ان سے بدتمیزی کی گئی اور دھمکیاں دی گئیں۔ان کا کہنا تھا کہ ٹیم مینجمنٹ شہزاد سے معافی مانگنے کی درخواست کرے ورنہ وہ اگلے ٹیسٹ کے دوران شہزاد کے خلاف مظاہرہ کریں گے۔