ابو ظبی (نیوز ڈیسک) شعیب ملک کے عمدہ کھیل نے اہلیہ ثانیہ مرزا کو بھی شاداں کر دیا، فون پر کارکردگی کی مبارکباد دیتے ہوئے سیریز میں کسی موقع پر یو اے ای آنے کا بھی عندیہ دے دیا۔ شعیب ملک نے انگلینڈ سے جاری ابو ظبی ٹیسٹ کی پہلی اننگز میں 245 رنز کی شاندار اننگز کھیلی تھی، اس حوالے سے میڈیا سے بات چیت کرتے ہوئے انہوں نے کہا کہ میری اس اننگز پر اہل خانہ کی خوشی کا بھی کوئی ٹھکانہ نہیں ہے، اہلیہ ثانیہ مرزا کا بھی فون آیا ، انہیں بھی بے حد خوشی ہے کہ میں ان دنوں تراتر سے پرفارم کر رہا ہوں ، اگر انہیں ٹینس کی مصروفیات سے وقت ملا تو ممکن ہے کہ سیریز کے دوران کسی وقت وہ یو اے ای بھی آئیں ، شعیب نے کہا کہ بطور سپورٹس مین ہم دونوں پر ہی عمدہ کارکردگی کیلئے بہت دباو¿ ہوتا ہے۔ اب خوشی ہے کہ ہم دونوں ہی اپنے اپنے شعبوں میں کامیابیاں سمیٹ رہے ہیں ، میں تینوں طرز میں پرفارم کر چکا ہوں اور اب کوشش ہے کہ یہ سلسلہ طویل عرصے تک برقرار رکھوں۔ ایک سوال پر شعیب ملک نے تسلیم کیا کہ ان کے پاس ٹرپل سنچری کی تکمیل کا اچھا موقع تھا ، تاہم انتہائی گرم موسم میں طویل اننگز سے کریمپس پڑ گئے تھے اور بیٹنگ میں دشواری ہونے لگی جس کی وجہ سے وکٹ گنوا بیٹھا، انہوں نے امید ظاہر کی کہ مستقبل میں بڑی اننگز کے مزید کئی مواقع ملیں گے