نیویارک (نیوز ڈیسک) یوایس اوپن میں عالمی نمبر ایک سربیا کے نواک جکو وچ نے سخت مقابلے کے بعد ورلڈ نمبر دو سوئٹزرلینڈ کے راجر فیڈرر کو 4-6، 7-5، 4-6 اور 4-6 سے شکست دے کر رواں سال تیسرا گرینڈ سلام حاصل کیا۔ یہ جکووچ کا مجموعی طور پر دسواں گرینڈ سلام ٹائٹل ہے۔ اس سے قبل انھوں نے رواں سال آسٹریلین اوپن اور ومبلڈن میں کامیابی حاصل کی تھی لیکن فرنچ اوپن کے فائنل میں شکست سے دو چار ہوگئے تھے۔ جبکہ 2009 کے بعد راجر فیڈرر پہلی بار یو ایس اوپن کے فائنل میں پہنچے تھے۔ نواک جکووچ نے اپنی جیت کے بعد کہا کہ راجر جو کررہے ہیں وہ قابل تعریف ہے، وہ اب بھی بہتری کی جانب مائل ہیں اور میرے دل میں ان کے لیے بہت عزت ہے، جب آپ کو علم ہو کہ آپ کا مقابلہ بہترین کھلاڑی سے ہے تو آپ کو جیتنے کے لیے اپنا بہترین کھیل پیش کرنا ہوتا ہے اور یہ شام میرے لیے ناقابل یقین تھی۔ راجر فیڈرر نے اس سے قبل کہا کہ یہ اچھی مسابقت ہے لیکن شاید آج کی رات نہیں! ایک دوسرے کے ساتھ کھیلنا ہمیشہ مشکل رہا ہے اور میرے خیال سے ہم دونوں یہاں سے اپنے بارے میں اور ایک دوسرے کے بارے میں بہتر علم کے ساتھ لوٹیں گے۔