نئی دہلی(نیوز ڈیسک) بھارتی کرکٹ بورڈ میں جگموہن ڈالمیا کے خلاف بغاوت کے آثار دکھائی دینے لگے، بورڈ صدر کی خراب صحت کو وجہ قرار دیتے ہوئے ’سبکدوش‘ کرنے کی کوششیں شروع ہوگئیں، ’پیٹرن انچیف‘ کا لالی پاپ دیکر راضی کیا جائے گا۔ تفصیلات کے مطابق بھارتی کرکٹ بورڈ میں اس وقت موجودہ صدر جگموہن ڈالمیا اور سابق صدر این سری نواسن کے حواریوں کے درمیان جنگ عروج پر پہنچی ہوئی ہے جہاں ایک طرف ڈالمیا گروپ این سری نواسن کے بورڈ میٹنگز میں شرکت پر پابندی لگوانے کیلیے سپریم کورٹ کا دروازہ کھٹکھٹا چکا اور ان کو آئی سی سی کے چیئرمین کے عہدے سے بھی ہٹانے کی کوشش میں مصروف ہے وہیں دوسری جانب مخالف گروپ ڈالمیا کی گرتی ہوئی صحت کو جواز بناکر ان کی رخصتی کی منصوبہ بندی میں مصروف ہے، ایک میڈیا رپورٹ میں کہا گیا ہے کہ بورڈ کے سینئر فیصلہ ساز چاہتے ہیں کہ ڈالمیا صدر کا عہدہ چھوڑ دیں اور چونکہ وہ ایک قابل احترام شخصیت ہیں اس لیے ان کی خاطر ’پیٹرن انچیف‘ کا عہدہ تشکیل دیا جائے۔ اس سلسلے میں سینئر آفیشلز نے کولکتہ میں ڈالمیا اور ان کے بیٹے ابھیشیک سے بھی ملاقات کی تاہم ابھیشیک کا اصرار تھا کہ ان کے والد نہ صرف جلد صحتیاب ہوجائیں گے بلکہ بورڈ معاملات میں پوری طرح متحرک دکھائی دیں گے۔ ذرائع کا کہنا ہے کہ کچھ بورڈ ممبران فیصلہ سازی میں سست رفتاری سے سخت ناخوش ہیں، وہ سمجھتے ہیں کہ ڈالمیا کو اب اپنی ذمہ داریوں سے سبکدوش ہوجانا چاہیے مگر چونکہ ان کی کرکٹ کیلیے کئی خدمات ہیں اس لیے ان کی خاطر پیٹرن انچیف کا خصوصی عہدہ تشکیل دیا جائے ، دلچسپ بات یہ ہے کہ کچھ عرصہ قبل ڈالمیا خود بھی ایسے عہدے کی تشکیل کے حق میں تھے مگر تب وہ خود بورڈ کے صدر نہیں تھے، اب بھی اگر وہ اس نئے عہدے کی تجویز قبول نہیں کرتے تب انھیں زبردستی بورڈ کی صدارت سے نہیں ہٹایا جاسکتا تاوقت کہ وہ خود ہی استعفیٰ دے دیں۔