لاس اینجلس(نیوز ڈیسک)امریکی شہر بوسٹن 2024کے اولمپک کھیلوں کی میزبانی کی دوڑ سے باہر ہوگیا ہے، جس کے بعد دوسرا شہر لاس اینجلس کھیلوں کی میزبانی کا امیدوار بن گیا ہے۔ امریکی اولمپک کمیٹی کے مطابق لاس اینجلس کی 2024کے اولمپکس کی میزبانی کا امیدوار بننے میں حائل رکاوٹ اس وقت ختم ہوگی، جب لاس اینجلس سٹی کونسل نے اتفاق رائے سے فیصلہ دیا کہ لاس اینجلس شہر کھیلوں کی میزبانی کے حصول کے لیے بولی میں حصہ لے گا۔ لاس اینجلس کے میئر ایرک گارچیٹی اولمپک کھیلوں کی میزبانی کے حصول کی مہم کی بھرپور حمایت کر رہے ہیں، تاہم سٹی کونسل کے بعض ارکان کو خدشہ ہے کہ اولمپک کھیلوں پر ہونے والے اخراجات آمدنی سے بڑھنے کے بعد شہر کہیں مسائل سے دوچار نہ ہو جائے۔ سٹی کونسل کے ر±کن پال کری کوریان کا کہنا تھا وہ چاہتے ہیں کہ کھیلوں کی میزبانی لاس اینجلس کو ملے اور یہ کھیل کامیاب ہوں، لیکن یہ کامیابی ٹیکس دہندگان کی قیمت پر نہیں ہونی چاہئے۔ لاس اینجلس اس سے پہلے1932 اور1984 میں اولمپک کھیلوں کی میزبانی کر چکا ہے۔