کولمبو(نیوزڈیسک) کولمبو ٹیسٹ میں بھارتی کرکٹر ایشانت شرما کی بدمزاجی عروج پر رہی، مختلف اوقات میں وہ سری لنکن کرکٹرز سے تلخ کلامی کرتے دکھائی دیے۔گزشتہ روز ایشانت،دھمیکا پرساد سے الجھ پڑے، سری لنکن پلیئر نے دوسری اننگز میں آخری وکٹ گرانے کیلیے ایشانت کوتین شارٹ پچ بالز کیں جن سے وہ بڑی مشکل سے بچے،آخری گیند پر وہ سنگل لینے کیلیے دوڑے اور دھمیکا کو دیکھ کر ہیلمٹ کی جانب اشارہ کرتے ہوئے کہا کہ ’’اگلی گیند میرے سر پر مارنا‘‘ اس پر دونوں کے درمیان فقرے بازی ہوئی اور اس میں دنیش چندیمل، ایشون اور انجیلو میتھیوز بھی کود پڑے، صورتحال کنٹرول سے باہر ہوتی دیکھ کر امپائرز نے مداخلت کی اور معاملہ رفع دفع کرایا۔اس سے قبل ایشانت نے کوشل پریرا کو آؤٹ کرنے کے بعد انتہائی جارحانہ انداز میں پویلین کی جانب جانے کا اشارہ کیا تھا۔ اس پر فاسٹ بولرکا کہنا ہے کہ میں نے تو صرف پریرا سے یہ کہا تھا کہ ’’تم ڈنر کس وقت کرتے ہو‘‘۔