کراچی(نیوز ڈیسک)پی سی بی بھارت کے رسمی انکار کا مزید 2ماہ انتظار کرے گا، چیئرمین شہریارخان کا کہنا ہے کہ بی سی سی آئی نے سیریز کھیلنے سے باضابطہ طور پر انکار نہیں کیا، مگر ہم اپنے پلان بی پر عمل درآمد کیلیے زیادہ انتظار نہیں کر سکتے۔تفصیلات کے مطابق سیاسی و سرحدی کشیدگی کی وجہ سے دسمبر میں یو اے ای میں شیڈول پاک بھارت سیریز شدید خطرات کی زد میں ہے،اس حوالے سے ایک کرکٹ ویب سائٹ کو انٹرویو میں چیئرمین پی سی بی شہریارخان نے کہا کہ موجودہ حالات میں سیریز کا امکان بیحد کم ہے۔ہمیں یہ حقیقت تسلیم کرنا ہوگی کہ بھارت ہمارے ساتھ نہیں کھیلے گا، ہم اس غیریقینی صورتحال میں زیادہ انتظار نہیں کر سکتے،اپنے پلان بی پر عمل درآمد سے قبل مزید 2 ماہ معاملات دیکھیں گے، تاحال بھارت نے باضابطہ طور پر انکار نہیں کیا ہے، انھوں نے کہا کہ مجھے امید ہے کہ ماحول بہتر ہوگا مگر اس وقت خاصی کشیدگی ہے، دونوں ممالک کے تعلقات خاصے پیچیدہ ہیں مگر کرکٹ کو نقصان نہیں پہنچنا چاہیے۔انھوں نے کہا کہ ہم جانتے ہیں کہ بھارتی بورڈ مالی طور پر بہت مستحکم ہے اور سیریز نہ ہونے سے ہمیں خاصا نقصان ہوگا، مگر ایسا نہیں ہے کہ ہم ان سے کھیلے بغیر نہیں رہ سکتے، ہمارا موقف صرف یہ ہے کہ کرکٹ کو سیاست کے ساتھ نہیں ملانا چاہیے، اسی لیے ایم او یو کے مطابق سیریز کی کوشش کر رہے ہیں۔بھارت کو معاہدے کی پابندی کرنا چاہیے اور اگر وہ نہیں کرے گا تو یہ اسی کی ذمہ داری ہوگی۔ یاد رہے کہ دسمبر کی سیریز میں شیڈول کے تحت3 ٹیسٹ،5 ون ڈے اور 2 ٹوئنٹی 20 میچز کھیلے جانے ہیں، گذشتہ دنوں بھارتی پنجاب میں پولیس اسٹیشن پر حملے کے بعد سے دونوں ممالک میں تعلقات خاصے کشیدہ ہو چکے ہیں۔