کراچی(نیوز ڈیسک) پاکستانی ٹی ٹوئنٹی کرکٹ ٹیم کے کپتان شاہد آفریدی نے پاکستان کرکٹ بورڈ کو محمد عامر، محمد آصف اور سلمان بٹ کو ٹیم میں منتخب کرنے سے قبل اچھی طرح سوچ لینے کا مشورہ دے دیا۔
شاہد آفریدی نے کراچی جناح اسپتال کا دورہ کیا جس کے بعد میڈیا سے گفتگو میں ان کا کہنا تھا کہ یہ پی سی بی کے لیے ایک بہت بڑا فیصلہ ہے اور میں بورڈ پر زور دوں گا کہ وہ مستقبل کے لائحہ عمل کے بارے میں اچھی طرح سوچ لیں۔انہوں نے کہا کہ اس حوالے سے پی سی بی کو بہت احتیاط سے کام لینا ہوگا کیوں کہ یہاں مستقبل کے کھلاڑیوں کے لیے ایک مثال قائم کرنی ہے۔جناح ہسپتال کے دوران کے دوران آفریدی نے مخلتف شعبوں میں موجود مریضوں کی عیادت کی۔
اس موقع پر آفریدی نے وارڈ کے مریضوں کےلئے بیس لاکھ روپے دینے کا بھی اعلان کیا۔اس سے قبل پی سی بی چیئرمین شہریار خان نے کہا تھا کہ ’بحالی پروگرام کے تحت آصف اور سلمان کو تمام ریجنز کا دورہ کرتے ہوئے نوجوان کھلاڑیوں کو منفی سرگرمیوں کے نقصان سے آگاہ کرنا ہو گا‘۔
شہریا ر کے مطابق، بحالی پروگرام کے بعدہی دونوں کھلاڑی کلب اور پھر گریڈ –ٹو کرکٹ کھیل سکیں گے۔خیال رہے کہ 2010 کے دورہ انگلینڈ کے دوران اسپاٹ فکسنگ میں ملوث پائے گئے تینوں کھلاڑیوں کی پابندی دو ستمبر کو ختم ہورہی ہے جس کے بعد سے ملک میں ان کھلاڑیوں کو ٹیم شامل کرنے یا نہ کرنے کے حوالے سے بحث چھڑگئی ہے۔
متعدد سابق کھلاڑیوں نے تینوں کو ٹیم میں شامل کرنے پر تحفظات کا اظہار کیا ہے جبکہ کچھ کہتے ہیں کہ ان کھلاڑیوں کو ایک اور موقع دینا چاہیے۔