کولمبو(نیوز ڈیسک) دنیا بھرکے کرکٹرز نے سنگاکاراکو زبردست الفاظ میں خراج تحسین پیش کیا ہے۔سماجی رابطے کی ویب سائٹ پر اپنے پیغام میں شاہد آفریدی نے کہا ہے کہ کرکٹ کے 2لیجنڈ سنگا کارا اور مائیکل کلارک رخصت ہورہے ہیں ان کی کھیل کیلیے خدمات کی قدر کرتا ہوں،سچن ٹنڈولکر کا کہنا ہے کہ آپ کھیل کے حقیقی سفیر رہے، جے وردنے نے کہا کہ آپ نے سری لنکن کرکٹ کو جو دیا ہے اس کا کریڈٹ کوئی نہیں چھین سکتا، آپ کیساتھ کھیلنے پر فخر ہے، کرس گیل نے کہا کہ کرکٹ کو یادگار لمحات فراہم کرنے پر عظیم سری لنکن کھلاڑی کا شکریہ ادا کرتے ہیں۔ہربھجن سنگھ نے کہا کہ طویل عرصہ تک انٹرنیشنل کرکٹ میں جلوے بکھیرنے کے بعد اب دوسری اننگز شروع ہورہی ہے جس کیلیے نیک خواہشات ہیں، ڈیمیئن مارٹن نے کہا کہ ایک قابل فخر کیریئر کا اختتام ہوا، آنے والی زندگی کیلیے دعاگو ہیں۔علاوہ ازیں سنگا کارا کے کوچ جے سندرا کا کہنا ہے کہ تجربہ کار بیٹسمین ایتھلیٹکس میں بھی سری لنکا کی جانب سے اولمپکس میں شرکت کرسکتے تھے، انھوں نے کہا کہ جونیئر سطح پر سنگا کارا کے والدکشیما نے مجھ سے کوچنگ کی درخواست کی تھی، سنگاکارا کی فٹنس بڑی شاندار تھی،وہ ایک بہترین ایتھلیٹ ثابت ہوسکتے تھے، تصویریں اتروانے سے گریز کرتے تھے لیکن انٹرنیشنل کیریئر میں کارنامے سرانجام دینے کے بعد اشتہاری کمپنیوں کا پسندیدہ چہرہ بن گئے۔