لاہور (نیوز ڈیسک)فارمولا ون ڈرائیور جینسن بٹن جو ان دنوں اپنی اہلیہ جیسکا کے ہمراہ فرانس میں چھٹیاں منا رہے، قیمتی سامان سے محروم ہوگئے ہیں۔چوروں نے رویرا میں جینسن بٹن کے کمرے میں گھس کے ان کا قیمتی سامان چرا لیا۔تفصیلات کے مطابق سابق فارمولا ون چیمپیئن کےترجمان نے بتایا ہے کہ دو افراد ان کے کمرے میں داخل ہوئے اور وہاں سے زیورات چرا کے لے گئے۔ ان زیورات میں ماڈل جیسکا کی منگنی کی انگوٹھی بھی شامل تھی۔ یہ واقعہ اس وقت پیش آیا جب یہ جوڑا اپنے دوستوں کے ہمراہ سینٹ ٹروپیز میں چھٹیاں منانے کیلئے ایک ولا میں مقیم تھا۔ امکان ہے کہ چوروں نے کارروائی سے قبل ولا میں موجود افراد سے بچنے کیلئے نیند آور گیس کا بھی استعمال کیا تھا۔ اس واقعے میں انھیں کوئی جسمانی نقصان نہیں پہنچا لیکن اس واقعے پر انھیں بہت حیرت ہوئی ہے۔ اندازہ ہے کہ چوری ہونے والی اشیا کی مالیت تین لاکھ پاو¿نڈ تھی۔واضح رہے کہ اس علاقے میں چوریوں کی وارداتیں تیزی سے بڑھ رہی ہیں اور خود پولیس نے بھی اعتراف کیا ہے کہ یہ معاملہ نہایت تیزی سے پھیل رہا ہے۔اس کیلئے چور، چوری سے پہلے ایئرکنڈیشننگ یونٹس کے ذریعے نیند آور گیس کا استعمال کرتے ہیں اور یوں ان کا کام آسان ہوجاتا ہے۔یاد رہے کہ 35 سالہ جینسن بٹن مناکو کی ٹیم میکلارن ٹیم کا حصہ ہیں۔ انھوں نے بران جی پی کے لیے ڈرائیونگ کرتے ہوئے سنہ 2009 میں فارمولا ون چیمپیئن شپ جیتی تھی اور سنہ 2014 میں آٹھویں نمبر پر رہے تھے