لاہور(نیوزڈیسک)باکسرعامرخان نے کہا ہے کہ پاکستان میں باکسنگ کے فروغ کے لیے کام کرنا چاہتا ہوں، پاکستان کے نوجوانوں میں بہت ٹیلنٹ ہے،ہمیں صرف پاکستانی نوجوانوں کے ٹیلنٹ کو سامنے لانا ہے۔ پاکستان کے دورے پر اہلیہ اور بچے کے ہمراہ برطانیہ سے آئے ہوئے باکسرعامرخان کا لاہورمیں پریس کانفرنس کرتے ہوئے کہنا تھا کہ مجھے لاہور اور لاہور پریس کلب میں آکرخوشی ہوئی ہے،پاکستان آ کر ہمیشہ خوشی محسوس ہوتی ہے، لاہور کے عوام زندہ دل ہیں ، بہت پیار کرنےوالے ہیں ۔ انہوں نے کہا کہ اگرسہولتیں میسرہوں تو پاکستانی کھلاڑی دنیا کے بہترین کھلاڑی بن سکتے ہیں، پاکستان نے اسپورٹس کے بڑے بڑے کھلاڑی پیدا کیے ہیں، جہانگیرخان اورجان شیرخان نے بہت نام بنایا،پاکستان کے عوام نے مجھے بھرپور سپورٹ کیا جس پر شکر گزار ہوں۔