لاہور(نیوز ڈیسک) پاکستانی نڑاد برطانوی باکسرعامر خان کا کہنا ہے کہ وہ ورلڈ چیمپئن باکسر مے ویدر فیلڈ سے مقابلے کی خواہش رکھتے ہیں لیکن شاید وہ مجھ سے ڈرتا ہے۔اپنی اہلیہ اور بیٹی کے ہمراہ پاکستان پہنچنے پر عامر خان کا کہنا تھا کہ پہلی بار اپنی فیملی کے ہمراہ یہاں آکر بہت خوشی محسوس کر رہا ہوں، ابھی 4 روزہ مختصر دورے پر پاکستان آیا ہوں، آئندہ ماہ دوبارہ آو¿ں گا۔ ان کا کہنا تھا کہ پاکستان میں باکسنگ کے حوالے سے بہت ٹیلنٹ موجود ہے، نوجوانوں باکسرز سے ملاقات کر کے انھیں اپنے تجربات سے مستفید کروں گا۔عامر خان کا کہنا تھا کہ نوجوانوں کو عامر خان باکسنگ اکیڈمی کے تحت سپورٹ کے لئے آیا ہوں، باکسنگ اکیڈمی کی کامیابی کے لئے پر امید ہوں۔ ان کا کہنا تھا کہ ورلڈ چیمپئن باکسر مے ویدر سے مقابلے کی خواہش ہے لیکن شاید وہ مجھ سے ڈرتا ہے۔