زیورخ (نیوز ڈیسک) فٹبال کی عالمی تنظیم فیفا نے آئندہ ورلڈ کپ کے شیڈول کا اعلان کردیا ہے۔2018 میں منعقد ہونے والے اس ورلڈ کپ کی میزبانی روس کرے گا۔شیڈول کے مطابق ٹورنامنٹ میں32 ٹیموں کے درمیان کل 64 میچز کھیلے جائیں گے۔تفصیلات کے مطابق گورننگ باڈی کی جانب سے جاری کردہ تفصیلات کے مطابق فٹبال کی تاریخ کا 21واں ورلڈ کپ14 جون سے 15 جولائی کے درمیان روس میں کھیلا جائے گا۔ اس سلسلے میں11 شہروں کے 12 اسٹیڈیمز ان میچوں کی میزبانی کریں گے۔ ماسکو کا لوزنائیکی سٹیڈیم افتتاحی میچ، ایک سیمی فائنل اور فائنل کی میزبانی کرے گا۔ شیڈول کا اعلان فیفا کی آرگنائزنگ کمیٹی نے کیا۔ اس موقع پر 2017 کے کنفیڈریشن کپ کے شیڈول کا اعلان بھی کیا گیا۔ کنفیڈریشن کپ بھی روس کی میزبانی میں ہو گا جس میں آٹھ ٹیمیں حصہ لیں گی۔ اس ٹورنامنٹ میں سینٹ پیٹرز برگ سٹیڈیم فائنل کی میزبانی کرے گا۔