لاہور(نیوزڈیسک) ٹیسٹ ٹیم کے کپتان مصباح الحق نے کہا ہے کہ کرکٹ سے ریٹائرمنٹ سے پہلے پاکستان میں ایک ٹیسٹ میچ کھیلنے کی شدید خواہش ہے ،ہوم گراﺅنڈ پر اپنے مداحوں کے سامنے کھیلنے سے بہتر کچھ بھی نہیں ہو سکتا۔ ایک انٹر ویو میں مصباح الحق نے کہا کہ میں امید کر رہا ہوں کہ ریٹائرمنٹ سے پہلے پہلے پاکستان میں کھیل سکوں۔انہوں نے کہا کہ سچ بات یہ ہے کہ میں مستقبل کے بارے میں سوچ رہا ہوں۔ میرے پاس مختلف آپشن ہیں۔سب سے اہم بات یہ ہے کہ آپ ریٹائرمنٹ کے بعد خاندان کو زیادہ سے زیادہ وقت دیںلہٰذامیں کوئی ایسا کام کرنا چاہوں گا جس میں مجھے اپنے اہل خانہ سے ساتھ زیادہ سے زیادہ وقت گزارنے کا موقع مل سکے۔اپنے محتاط انداز اور اکثر و بیشتر سست روی سے رنز بنانے کی شہرت رکھنے والے مصباح عالمی کیرئیر ختم ہونے کے بعد ٹی ٹونٹی لیگز کھیلنے میں بھی دلچسپی رکھتے ہیں۔