پورٹ آف سپین (نیوز ڈیسک) کیریبیئن پریمیئر لیگ کے سلسلے میں ٹرینیڈاڈ اینڈ ٹوباگو ریڈ سٹیل اور جمیکا تلاوا کے مابین کھیلے گئے میچ میں ریڈ سٹیلز کو سات رنز سے فتح حاصل ہوئی ہے۔ اس فتح کو یقینی بنانے میں ڈیوائن براوو اور جیک کیلس کی شاندار پرفارمنس نے اہم کردار کیا۔ اس کامیابی کے نتیجے میں ریڈ سٹیل کی ٹیم ایونٹ کے سیمی فائنل کیلئے کوالیفائی کرگئی ہے۔ تفصیلات کے مطابق ریڈ سٹیل کی ٹیم پہلے کھیلنے کیلئے میدان میں اتری تو جیک کیلس نے 61جبکہ ڈیوائن براوو نے 49رنز کے ذریعے ٹیم کو مضبوط بنیاد فراہم کی تاہم ٹیم کا مجموعی سکور صرف145رنز رہا۔ جوابی اننگز کیلئے جس وقت جمیکا کا خطرناک ہتھیار کرس گیل میدان میں آئے اور افتتاحی اوور کی پہلی پانچ گیندوں پر ہی تین چھکے اور دو چوکے جڑ ڈالے تو ٹیم کی فتح یقینی دکھائی دینے لگی۔ اس کے بعد جیک کیلس اور براوو نے حکمت عملی تبدیل کردی اور انہیں اگلے پورے اوور کے دوران ایک بھی گیند باو¿نڈری سے باہر نہ پھینکنے دی۔ تیسرے اوور کے اختتام تک ڈیوائن براوو نے گیل کے علاوہ مہیلا جے وردھنے کو بھی پویلین واپس بھیج دیا تھا۔ اس وقت جمیکنز کا سکور36رنز تھا۔ دیگر کھلاڑیوں نے ٹیم کو فتح کے نزدیک تر کیا تاہم براوو کے آخر تک ڈٹ جانے کے سبب جمیکنز کو سات رنز سے شکست ہوگئی۔