لاہور (نیوز ڈیسک) سربیئن ٹینس سٹار نوواک جکووچ جو ٹینس کورٹس میں اپنی عجیب و غریب حرکتوں کیلئے مشہور ہیں، گزشتہ روز اس وقت خوب شرمندہ ہوئے جب قمیض پھاڑنے کی کوشش ناکام ہوگئی۔ گزشتہ رات کھیلے گئے ومبلڈن فائنل کے انتہائی سنسنی خیزمیچ کے دوسرے سیٹ کے دوران جب وہ سوئس پلیئر راجر فیڈرر کیخلاف ٹائی بریکر ہارے تو شدید غصے میں دکھائی دیئے۔ اس موقع پر انہوں نے ریکٹ پٹخ کے ہلک کی نقالی کرتے ہوئے قمیض پھاڑنے کی کوشش بھی کی تاہم مضبوط کپڑے کی بنی ہونے کے سبب وہ اسے پھاڑ نہ سکے۔اس مرحلے پرجکووچ اس قدر شرمندہ دکھائی دیئے کہ سینٹرکورٹ کے قوانین کو بھی بھول کئے اور اپنی قمیض کو روایتی انداز میں اتار ڈالا۔ اس سے قبل جکووچ نے 2010میں آسٹریلوی چیمپئن لیٹن ہیوٹ کو ہرانے کے بعد بھی ایسی ہی انداز میں کامیابی کا جشن منایا تھا اور اپنی پھٹی قمیض مداحوں میں اچھال دی تھی۔ اس بار وہ اپنی قمیض تو نہ اچھال سکے البتہ انہوں نے ماضی کی روایت برقرار رکھتے ہوئے سینٹر کورٹ کی گھاس ضرور چبائی۔ جکووچ کورٹ کی گھاس بھی کھاتے ہیں اور ہر بار گراس کورٹ سے گھاس نوچتے ہوئے انہیں دیکھا جاسکتاہے