زیورخ(نیوزڈیسک) ارجنٹائن کے سابق سٹار فٹبالر ڈیاگو میراڈونا نے فیفا کی صدارت کا انتخاب لڑنے کا اعلان کر دیا ہے۔ میراڈونا کے دوست اور یوراگوئے سے تعلق رکھنے والے صحافی وکٹر ہیوگو نے اس خبر کی تصدیق کی ہے۔ وکٹر ہیوگو موریلس کے مطابق انہوں نے میراڈونا سے ان کے والد کی خیریت جاننے کے لئے فون کیا جس میں میراڈونا نے انہیں بتایا کہ وہ فیفا کی صدارت کے لئے امیدوار ہوں گے۔ وکٹر ہیوگو کے مطابق میراڈونا نے انہیں کہا کہ وہ اس خبر کو منظر عام پر لے آئیں کہ میراڈونا فیفا کے صدارتی انتخابات میں حصہ لیں گے۔ میراڈونا فیفا کے صدر سیپ بلاٹر پر تنقید کرنے والوں میں شامل ہیں۔خیال رہے کہ ڈیاگو میراڈونا کو فٹ بال کی تاریخ کے عظیم کھلاڑیوں میں شمار کیا جاتا ہے۔ 1986ءمیں ارجنٹائن نے میراڈونا کی قیادت میں عالمی کپ میں شرکت کی اور حتمی مقابلے میں مغربی جرمنی کو شکست دے کر عالمی چیمپیئن بنا۔ میراڈونا نے ٹورنامنٹ کے بہترین کھلاڑی کا اعزاز حاصل کیا۔1986 کے کوارٹرز فائنل میں انگلستان کے خلاف دو گولز نے ڈیاگو میراڈونا کو ایک افسانوی حیثیت دے دی۔ میرڈونا کی جانب سے پہلا گول “خدائی ہاتھ” کے نام سے دنیا بھر میں مشہور ہوا۔ میراڈونا کو 2002ءمیں فٹ بال کی عالمی تنظیم فیفا کی جانب سے کئے گئے ایک آن لائن پول میں صدی کا بہترین گول قرار دیا گیا۔واضح رہے کہ سیپ بلاٹر نے فیفا کی صدارت سے مستعفی ہونے کا اعلان کیا تھا تاہم وہ نئے صدر کے انتخاب تک عہدے پر برقرار رہیں گے۔