میر پور(نیوز ڈیسک) آ ئی سی سی چیمپئنز ٹرافی کیلئے بنگلہ دیش نےکوالیفائی کرلیا۔ گزشتہ روز ہوم ٹیم نے بھارت کیخلاف ون ڈے سیریز جیت لی۔ اتوار کو دوسرے ون ڈے میں بنگال ٹائیگرز کو بارش کے بعد ڈک ورتھ اینڈ لوئس میتھڈ کی بدولت چھ وکٹوں سے کامیابی ملی۔ بھارت نے 47اوورز پر مشتمل میچ میں 200بنائے۔اوپنر شیکھر دھون 53رنزبنا کر نمایاں بیٹسمین رہے۔ کپتان مہندر سنگھ دھونی 47اور سریش رائنا 34رنز تخلیق کر سکے۔ رویندر جڈیجا کو 19رنز پر وکٹ چھوڑنا پڑی۔ چھ کھلاڑی ڈبل فیگر میں داخل نہ ہوسکے۔ مستفیض الرحمن نے ایک مرتبہ پھر عمدہ بالنگ کرتے ہوئے 43رنز کے عوض چھ مہرے کھسکائے۔ ناصر حسین ور روبیل حسین نے دو، دو وکٹوں کا بٹوارا کیا۔ جواب میں میزبان ٹیم نے مطلوبہ ہدف 38اوور ز میں چار وکٹیں گنوا کر حاصل کر لیا۔ شکیب الحسن نے ناقابل شکست51رنز کی اننگز تراشی۔