ڈھاکا(نیوز ڈیسک)بھارتی ٹیسٹ ٹیم کے کپتان ویرات کوہلی نے اوپننگ بلے باز شیکھر دھاون کو سابق جارحانہ بلے باز وریندر سہواگ کا متبادل قرار دیتے ہوئے کہا کہ وہ بھارتی ٹیم کیلئے وہی کارہائے نمایاں انجام دے سکتے ہیں جو ماضی میں وریندر سہواگ انجام دیا کرتے تھے۔شیکھر دھاون نے بنگلہ دیش کے خلاف واحد ٹیسٹ میچ میں 173 رنز کی جارحانہ اننگ کھیلی تھی جبکہ وہ ورلڈ کپ میں بھی بھارت کیلئے شاندار کارکردگی کا مظاہرہ کر چکے ہیں۔کوہلی نے کہا کہ ہمیں دھاون پر ہمیشہ ہی اعتماد ہوتا ہے کہ اگر وہ ٹیسٹ میچوں میں چل گئے تو وہ وہی کام کر سکتے ہیں جو ویرو پا جی(وریندر سہواگ) کیا کرتے تھے کیونکہ وہ ایسے کھلاڑی ہیں جو پورے سیشن کا نقشہ بدل سکتے ہیں۔کوہلی نے امید ظاہر کی کہ شیکھر ٹیسٹ میچ کی شاندار کارکردگی کا سلسلہ مستقبل میں بھی برقرار رکھیں گے۔انہوں نے کہا کہ میں چاہتا ہوں کہ میرے پاس ایسے کھلاڑی ہوں جو میچ جیت سکتے ہوں اور ان دونوں کھلاڑیوں میں یہ صلاحیت موجود ہے۔