لاہور (نیوز ڈیسک) قومی ٹیم کے وکٹ کیپر سرفراز احمدآج شادی کے بندھن میں بندھ رہے ہیں۔ اس سلسلے میں وہ چند روز قبل ہی کراچی پہنچ چکے ہیں۔ امکان ہے کہ سرفراز آج کریم کلر کی شیروانی مع سرخ کلا زیب تن کریں گے کیونکہ گزشتہ دنوں وہ کراچی کے ایک معروف بوتیک پر اپنا لباس چیک کرتے دیکھے گئے تھے۔ گزشتہ روز ان کی مہندی کی تقریب منعقد ہوئی تھی جس میں کرکٹر کے دوست احباب اور رشتہ داروں نے خوب بڑھ چڑھ کے حصہ لیا۔ سرفراز احمد سپر ایٹ ٹی ٹوئنٹی ٹورنامنٹ کے سلسلے میں فیصلہ آباد میں تھے تاہم ان کی شادی کی تقریبات شروع ہونے پر انہیں فارغ کردیا گیا اور کراچی ڈولفنز کی قیادت محمد سمیع کو سونپ دی گئی۔ محمد سرفراز کو اپنی دلہن کے ساتھ زیادہ وقت گزارنے کا موقع شائد نہ ملے کیونکہ ان کا نام زمبابوے کیخلاف ٹی ٹوئینٹی سیریز کے سلسلے میں اعلان کردہ سکواڈ میں شامل ہے اور اس کیلئے انہیں جلد ہی لاہور آنا پڑے گا۔ یہ سیریز 22مئی سے شروع ہورہی ہے۔