لندن (نیوزڈیسک) انگلینڈ اور ویسٹ انڈیز کے بیچ ٹیسٹ سیریز ڈرا ہوئے ابھی چند گھنٹے بھی نہیں گزرے ہیں کہ کوچ کی تبدیلی کا مطالبہ زور پکڑ چکا ہے۔ اس حوالے سے جس شخص کو سب سے زیادہ مضبوط امیدوار تصور کیا جارہا ہے وہ ہیں جیسن گلسپی۔ سابق آسٹریلین پیسر جیسن گلسپی ان دنوں انگلش کاو¿نٹی ٹیم یارکشائر کی کوچنگ کررہے ہیں۔ انہیں حال ہی میں جنوبی آسٹریلیا کی کوچنگ کی پیشکش بھی کی گئی تھی جسے انہوں نے آج ہی مسترد کردیا ہے جس کے بعد امکان ظاہر کیا جارہا ہے کہ دراصل وہ انگلش بورڈ کی جانب سے کسی پیشکش کی امید میں ہیں۔ واضح رہے کہ انگلینڈ اینڈ ویلز کرکٹ بورڈ کے چیئرمین کولن گریوز پہلے ہی کہہ چکے ہیں کہ اگر انگلینڈ کی ٹیم ونڈیز جیسی درمیانی سی ٹیم کو نہ ہرا سکی تو اس کیخلاف کارروائی ہوگی۔