لاہور(نیوز ڈیسک) اے ایف سی انڈر23 کوالیفائنگ راﺅنڈکے لیے پاکستانی کھلاڑی جمعے سے لاہور میں تیاریوں کا آغاز کریں گے۔15 مئی سے متحدہ عرب امارات میں شیڈول ایونٹ میں پاکستان سمیت اردن، کویت، کرغزستان اور ترکمانستان کی ٹیمیں حصہ لیں گی۔گروپ بی کے ان مقابلوں کی فاتح سائیڈ آئندہ برس شیڈول مین مرحلے میں رسائی حاصل کرلے گی۔یاد رہے کہ اے ایف سی انڈر 23 کوالیفائنگ راﺅنڈ گروپ بی کے مقابلے لاہور میں ہونے تھے لیکن سانحہ یوحنا آباد کے بعد ایشین فٹبال کنفیڈریشن نے ایونٹ ملتوی کردیا، بعد ازاں میزبانی کیلیے قطر کا انتخاب ہوا لیکن بعض تکنیکی وجوہات کی بنا کر وہاں انعقاد نہ ہونے پر یو اے ای کے شہر العین میں میچزکرانے کا فیصلہ ہوا۔ ٹورنامنٹ میں پانچ ٹیمیں شرکت کریں گی۔
پاکستان فٹبال فیڈریشن نے تیاریوں کے لیے قومی اسکواڈ کا کیمپ جمعے سے لاہور میں لگانے کا فیصلہ کیا ہے، اس میں واپڈا کے علی احسن، محمد بلال، محمد بلال سینئر، آرمی کے شہباز یونس، نیشنل بینک کے عامر صدیقی، ثنااللہ، زین العابدین، باسط بلوچ، عثمان خان اور مینر شامل ہیں، کے الیکٹرک کے محمد ریاض، ایچ بی ایل کے حبیب الرحمان، سوئی ناردرن گیس کے فہیم، کے آر ایل کے ثاقب حنیف، ملک عمر صدام حسین، سوئی سدرن کے عبدالاسلام، دانش حمید، نیوی کے شہروز احمد، محسن علی، شہرام بابر، نوید احمد، احسان اللہ، منصور خان، محمد سہیل، محمد سفیان، ریلویز کے وسیم الدین، عدنان ،سعد اللہ اور فضل حسن کا انتخاب ہوا۔
محمد شاملان مبارک ہیڈ کوچ، اصغر خان انجم اسسٹنٹ منیجر، حسن بلوچ ، تنویر احمد اور زاہد تاج اسسٹنٹ کوچ ہوں گے۔ کیمپ کے دوران کھلاڑی روزانہ 2سیشنز میں ٹریننگ کریں گے، صبح 8 سے 10 تک جسمانی مشقیں ہوں گی جبکہ شام کے سیشنز میں پانچ بجے کے بعد تکنیکس بہتر بنانے کے لیے ڈرلز کرائی جائیں گی۔