لاہور ( نیوزڈیسک) پاکستان کرکٹ بورڈ کے چیئرمین شہریار خان نے بنگلہ دیش میں قومی کرکٹ ٹیم کی مایوس کن کارکردگی کا نوٹس لیتے ہوئے کہا ہے کہ ہماری ٹیم کی مایوس کن کارکردگی غیر متوقع تھی،بنگلہ دیش سیریز ختم ہو گی اسکے بعد شکست کے تمام عوامل کا جائزہ لیا جائے گا۔پاکستان بنگلہ دیش کے خلاف ون ڈے سیرز میں کلین سویپ کا سامنا کرنا پڑا۔ اپنے جاری کردہ بیان میں چیئرمین پی سی بی شہریار خان نے کہا کہ شکست کے باوجود پی سی بی ابھی کوئی ایسا سخت قدم نہیں اٹھانا چاہتی۔ تاہم جب بنگلہ دیش سیریز ختم ہو گی اسکے بعد شکست کے تمام عوامل کا جائزہ لیا جائے گا۔انہوں نے کہا کہ پاکستانی کرکٹ شائقین کی طرح وہ بھی ٹیم کی کارکردگی سے انتہائی مایوس ہوئے ہیں۔ لیکن ہمیں یہ بھی یاد رکھنا ہو گا کہ ہماری حریف ٹیم انتہائی پروفیشنل ٹیم ہے جس نے گذشتہ سالوں میں بڑی تیزی سے اپنی پرفارمنس کو بہتر کیا ہے۔ ہماری ٹیم کی مایوس کن کارکردگی غیر متوقع تھی۔انہوں نے مزید کہا کہ خوش آئند بات یہ ہے کہ اس دورہ کے دوران کچھ کھلاڑیوں نے بہترین کارکردگی کا مظاہرہ کیا ،خاص طور پر کپتان اظہر علی، محمد رمضان، سعد نسیم اور سمیع اسلم کے نام شامل ہیں ۔انہوں نے کہا کہ ہمیں اپنی ٹیم کی فٹنس پر توجہ دینا ہو گی اور فیلڈنگ سمیت دیگر چیزوں پر بھی بہتری لے کر آنا ہو گی۔ کھلاڑیوں کو ذہنی طور پر مضبوط بننا ہو گا ۔انہوں نے کہا کہ ابھی بھی پاکستان کرکٹ ٹیم کا ٹیسٹ اور ٹی ٹونٹی میں بہتر ریکارڈ ہے اور ہمیں اپنی ون ڈے رئیٹنگ کو مزید بہتر کرنا ہو گا مجھے یقین ہے کہ مقررہ وقت کے اندر یہ نوجوان ٹیم بہتر رزلٹ دکھائی گی۔