میرپور (نیوز ڈیسک ) بنگلا دیش کا حساب چکتا کرنے کے لیے پاکستانی ٹیم ون ڈے سیریز کے دوسرے میچ میں آج میدان میں اترے گی۔ کپتان اظہر علی کا کہنا ہے کہ ٹیم میں کم بیک کرنے کی صلاحیت موجود ہے۔ پاکستان اور بنگلا دیش کے درمیان سیریز کا دوسرا ون ڈے میچ میرپور کے شیر بنگلہ سٹیڈیم میں کھیلا جائے گا۔ میچ پاکستانی وقت کے مطابق دوپہر ڈیڑھ بجے ہی شروع ہو گا۔ اظہر علی کے مطابق ٹیم میں کم بیک کرنے کی صلاحیت موجود ہے۔ کپتان کا کہنا ہے کہ باﺅلنگ اٹیک ہی ٹیم کو سیریز میں واپس لا سکتا ہے۔
اہم میچ میں سعید اجمل کو نئے ایکشن کیساتھ ردھم میں آنے کا ایک اور موقع فراہم کیا جائیگا ، ادھر زخمی احسان عادل کی جگہ عمر گل کو طلب کیا گیا ہے ، اگر پانچویں باﺅلر کیساتھ میدان میں اترنے کا فیصلہ ہوا تو پھر سعد نسیم کو باہر بیٹھنا پڑے گا جبکہ ذوالفقار بابر کو بھی کھلانے کا آپشن موجود ہے۔ دوسری جانب بنگلا دیشی کھلاڑیوں کی آنکھیں نئی تاریخ رقم کرنے کے خواب دیکھنے لگیں۔ مہمان ٹیم کیخلاف کبھی سیریز نہ جیت پانے کی روایت بھی توڑنے کو بے تاب ہیں۔ سلو اوور ریٹ کے باعث ایک میچ کی معطلی کے بعد کپتان مشرفی مرتضیٰ کی ٹیم میں واپسی ہوگی۔ ون ڈے سیریز کے افتتاحی میچ میں میزبان بنگلا دیش نے پاکستان کو 79 رنز سے شکست دے کر نہ صرف ایک صفر کی برتری حاصل کی تھی بلکہ ایک روزہ کرکٹ میں گرین شرٹس کے خلاف 16 سال بعد کامیابی کی تاریخ بھی رقم کی۔