شنگھائی (نیوز ڈیسک) آسٹریلیا کے سابق کپتان مائیکل وان نے بھارتی بلے باز ویراٹ کوہلی کو مشورہ دیا ہے کہ وہ کامیاب کپتان بننے کیلئے دھونی سے سیکھیں۔ انہیں بطور کپتان اپنے اندر پختگی لانے کیلئے دھونی کی مانند جذبات پر قابو رکھنے کی عادت ڈالنا ہوگی۔کوہلی نے حال ہی میں بھارتی ٹیسٹ ٹیم کی قیادت سنبھالی ہے جب دھونی نے کینگروز کیخلاف سیریز کے تیسرے ٹیسٹ کے بعد اچانک ہی ٹیسٹ فارمیٹ سے ریٹائرمنٹ کا اعلان کیا۔اس کے بعد کوہلی نے آخری ٹیسٹ میں ٹیم کی قیادت کی۔وہ اگرچہ اس میچ کو ڈرا کرنے میں کامیاب رہے تاہم یہ سیریز کینگروز نے دو صفر سے جیت لی تھی۔ اس موقع پر کوہلی کی قائدانہ صلاحیتوں کا وان نے بھی مشاہدہ کیا تھا۔ ان کا کہنا تھا کہ کوہلی کو سنجیدہ بننا ہوگا۔ رواں ورلڈ کپ میں اس کے ساتھ کچھ مسائل دکھائی دیئے تھے۔ دھونی لوگوں کے تبصروں کی پروا نہیں کرتا۔ وہ معاملات کو سیدھا رکھتا ہے اور میدان میں اپنی ذمہ داریوں کو شاندار طریقے سے ادا کرنے پر توجہ دیتا ہے۔ مجھے کوہلی کا جذبہ پسند ہے لیکن یہ جذبہ قابو سے باہر نہیں ہونا چاہئے۔ یہی جذبہ اس کی خوبی ہے لیکن اس کے ساتھ ساتھ اسے اس کو استعمال میں لانے کے طریقے پر بھی غور کرنا ہوگا۔