لاہور(نیوزڈیسک) پاکستانی فاسٹ باو¿لر سہیل خان فٹنس مسائل کی وجہ سے دورہ بنگلہ دیش سے باہر ہو گئے ہیں اور جنید خان کو ان کے متبادل کے طور پر ٹیم میں شامل کیا گیا ہے۔جمعہ کو تربیتی کیمپ میں سہیل خان نے کمر میں تکلیف کی شکایت کی تھی۔قومی ٹیم کے چیف سلیکٹر ہارون رشید نے کرکٹ کی معروف ویب سائٹ سے گفتگو میں سہیل خان کے دورہ بنگلہ دیش سے باہر ہونے کی تصدیق کی۔انہوں نے کہا کہ سہیل خان کی غیر یقینی فٹنس کے باعث ہم نے جنید خان کو ایک روزہ میچز کی ٹیم میں بھی شامل کرنے کا فیصلہ کیا ہے۔چیف سلیکٹر نے کہا کہ ہم فی الحال یہ نہیں کہہ سکتے کہ سہیل کی انجری کس حد تک سنگین نوعیت کی ہے لیکن فی الحال انہیں دو ہفتے آرام کا مشورہ دیا گیا ہے۔واضح رہے کہ جنید خان پہلے ہی پاکستان کے ٹی ٹوئنٹی اور ٹیسٹ اسکواڈ کا حصہ ہیں۔سہیل ورلڈ کپ کے لیے اعلان کردہ 30 رکنی اسکواڈ کا حصہ نہیں تھے لیکن انہیں غیر متوقع طور پر پاکستان کے 15 رکنی اسکواڈ میں شامل کیا گیا تھا۔انہوں نے روایتی حریف ہندوستان کے خلاف پہلے ہی میچ میں پانچ وکٹیں لینے کے ساتھ ساتھ عالمی کپ میں 12 وکٹیں حاصل کی تھیں۔
جنید خان گھٹنے اور ران کی انجری کے باعث اکتوبر سے پاکستان کی نمائندگی نہیں کر سکے تاہم لاہور کی نیشنل کرکٹ اکیڈمی میں بحالی کے عمل سے گزرنے کے بعد وہ اپنی انجری سے نجات پانے میں کامیاب رہے اور انہیں دورہ بنگلہ دیش کے لیے ٹیم کا حصہ بنایا گیا۔
