لاہور(نیوز ڈیسک )پاکستان اور یو اے ای کے مابین ہونے والے ون ڈے اور ورلڈ کپ میچز میں پاکستان ٹیم کا پلڑا بھاری ہے۔ پاکستان کی ٹیم نے یو اے ای کی ٹیم کے خلاف اب تک دو ون ڈے میچز کھیلے ہیں جن میں سے دونوں میں گرین شرٹس نے فتح حاصل کی اور یو اے ای کی ٹیم کو ئی میچ نہیں جیت سکی۔ ورلڈ کپ ٹورنامنٹس میں دونوں ٹیموں کے مابین24فروری 1996کو گوجرانوالہ کے جناح سٹیڈیم میں واحد ون ڈے میچ کھیلا گیا جو کہ پاکستان ٹیم نے9 وکٹوں سے جیتا تاہم ٹاس کے معاملے میں دونوں ٹیمیں برابر ہیں۔دونوں ٹیموں نے دو ون ڈے میچز میں ایک ایک بار ٹاس جیتا۔ دونوں ٹیموں کے مابین ورلڈ کپ کرکٹ ٹورنامنٹ 2015کا پول بی کا میچ آج بدھ کی صبح میکلئن پارک نیپئرمیں کھیلا جائے گا۔ پاکستان کی ٹیم نے پول میں اب تک تین میچز کھیلے جن میں سے دو ہارے ایک میں فتح حاصل کرکے دو پوائنٹ حاصل کئے ہوئے ہیں جبکہ یو اے ای کی ٹیم نے تین میچز کھیلے اور تینوں میں اسے شکست کا سامنا کرنا پڑا۔