اسلام آباد(مانیٹرنگ ڈیسک)7جولائی پاک وطن کے شیر دل سپوت ، پہاڑوں کے بیٹے ، سرحدوں کے محافظ حوالدار لالک جان کا یوم شہادت، کارگل جنگ میں دشمن کے چودہ طبق روشن کرنے والے حوالدار لالک جان کا تعلق گلگت بلتستان کی تحصیل عذر کے علاقے یسین سے تھا۔

یکم اپریل 1967کو پہاڑوں کے دامن میں خوبصورت وادی میں آنکھ کھولنے والا وطن عزیز کا یہ عظیم سپوت پاکستان کا اعلیٰ ترین فوجی اعزاز نشان حیدر کا مستحق ٹھہرا۔ آپ نے 7جولائی 1999میں کارگل معرکے میں بہادری کی نئی داستان رقم کرتے ہوئے دشمن کے چودہ طبق روشن کر دئیے۔کارگل معرکے کے دوران 12این ایل آئی رجمنٹ نے دشمن کے خلاف وہ مثالیں قائم کیں جس کو یادکر کے آج بھی بزدل دشمن کانپ اٹھتا ہے۔ آپ اس رجمنٹ کا حصہ تھے۔ آپ کو ایک خصوصی ٹاسک سونپا گیا آپ اپنی کمپنی کے ساتھ دشمن کے خلاف صف آرا ہوئے اور دشمن پر ذوالفقار کی طرح ٹوٹ پڑے۔ آپ کی بہادری اور وطن سے محبت کا یہ عالم تھا کہ آپ کے ساتھی اس کی مثال آج بھی دیتے ہیں اور یہ بہادری اور جرأت آج بھی پاک فوج میں ایک مثال کے طور پر یاد رکھی جاتی ہے۔ پہاڑوں کے بیٹے نے پہاڑوں میں ملک عزیز کے لئے جام شہادت نوش کرتے ہوئے اپنے خون سے وطن سے محبت کی گواہی دی۔ آپ کی اٹھارویں برسی کے موقع پر آپ کی صاحبزادی اور صاحبزادہ بھی اپنے والد کی نقش قدم پر چلتے ہوئے وطن عزیز کیلئے جان نچھاور کرنے کا عزم رکھتے ہیں جبکہ حوالدار لالک جان شہید کی والدہ نے بیٹے کی شہادت کو اپنے اور علاقے کیلئے فخر قرار دیا ہے۔