بغداد میں ایک شخص ابوحمزہ رہتے تھے جو سکری کے لقب سے مشہور تھے انھیں “سکری” کہنے کی وجہ کیا تھی؟ عربی میں “سکر” چینی کو کہتے ہیں دراصل ان کے اخلاق اتنے میٹھے تھے کہ ان کی ہر بات چینی کی طرح مزیدار لگتی تھی۔ لہذا انکے اخلاق کی بدولت لوگوں نے انہیں “سکری” مشہور کردیا تھا۔ ان کے بارے میں آتا ہے کہ وہ ایک بار سخت مقروض ھوگۓ چنانچہ اپنا گھر بیچ کر قرض ادا کرنا چاہا۔ جب محلے
والوں کو علم ہوا تو انھوں نے وجہ پوچھی؟ کہنے لگے مجھ پر مشکل وقت آگیا ہے اور معاشی طور پر کمزور ہوگیا ہوں۔ لوگوں نے مشورہ کیا اور اس بات پر متفق ہوۓ کہ اگر ھم سب محلے والوں نے مل کران کا قرض ادا نہ کیا اور “سکری” ھم سے چلے گۓ تو ہمیں ان جیسا کبھی نہیں ملے گا۔ تمام لوگوں نے مل کر قرض کی رقم ادا کی اور سکری کو اپنے محلے سے نہ جانے دیا اور نہ ہی ان کو مکان بیچنے دیا۔
