اسلام آباد (نیوز ڈیسک)پاور ڈویژن نے بجلی صارفین کو خبردار کیا ہے کہ بجلی کے بلوں پر موجود جعلی کیو آر کوڈز کے ذریعے

شہریوں کی ذاتی معلومات چوری کیے جانے کا خدشہ پیدا ہو گیا ہے، جس کے پیش نظر عوام کے لیے خصوصی ایڈوائزری جاری کر دی گئی ہے۔

میڈیا رپورٹس کے مطابق بعض عناصر صارفین کو مخصوص لنکس کے ذریعے اپنی معلومات فراہم کرنے پر آمادہ کر رہے ہیں۔ پاور ڈویژن کا کہنا ہے کہ معلومات درج کرنے کے بعد صارفین سے 6 ہندسوں پر مشتمل کوڈ طلب کیا جاتا ہے، جو فراڈ کا حصہ ہو سکتا ہے۔

حکام نے خبردار کیا کہ کچھ لوگ کیو آر کوڈ کا غلط استعمال کرتے ہوئے غیر قانونی مقاصد حاصل کرنے کی کوشش کر رہے ہیں، اس لیے صارفین انتہائی احتیاط برتیں۔

پاور ڈویژن کے مطابق بجلی کے بل سے متعلق معلومات صرف متعلقہ اور مستند پلیٹ فارم پر ہی درج کی جا سکتی ہیں، جبکہ کسی اور ویب سائٹ یا لنک پر تفصیلات فراہم کرنا خطرناک ثابت ہو سکتا ہے۔

ایڈوائزری میں شہریوں کو ہدایت کی گئی ہے کہ سبسڈی یا دیگر سہولیات کے نام پر کسی ڈیجیٹل پلیٹ فارم یا کاغذ پر اپنی ذاتی معلومات درج نہ کریں کیونکہ یہ طریقہ کار غیر قانونی اور مشکوک ہے۔