اسلام آباد (این این آئی)تحریک انصاف کے رہنما بابراعوان نے کہا ہے کہ حکومت زمان پارک میں آپریشن کا بہانا بنارہی ہے، یہ خود دہشت گرد ساتھ لاکر زمان پارک میں دکھائیں گے، خوف سے کوئی عمران خان کا ساتھ نہیں چھوڑے گا، پی ٹی آئی کو تقسیم کرنے کی سازش ناکام ہوگی۔
سپریم کورٹ کے باہر میڈیا سے گفتگو کرتے ہوئے سابق وفاقی وزیر بابر اعوان نے کہا کہ پہلے یہ کہا گیا زمان پارک کے اندر 40دہشت گرد ہیں، حیرانگی ہے کہ ان کے نام کسی کو بھی نہیں پتہ، انہیں کیسے پتہ چلا کہ زمان پارک میں دہشت گرد ہیں، یہ زمان پارک میں آپریشن کا بہانا بنارہے ہیں، یہ خود دہشت گرد ساتھ لاکر زمان پارک میں دکھائیں گے۔
پی ٹی آئی رہنما نے کہا کہ عمران خان اعلان کرچکے ہیں کہ میڈیا کی موجودگی میں سرچنگ کی جائے، ان کی یہ تیاری تھی کہ دہشت گردوں کو ساتھ لے کر جائیں گے اور وہاں سے پکڑیں گے، عمران خان اور پی ٹی آئی کے خلاف مقدمات کی اتنی ہی حقیقت ہے جتنی نواز شریف کی بیماری کی ، ایسے مقدمات سے کوئی نہیں ڈرے گا۔انہوں نے کہا کہ کیا آپ نے ارشد شریف کے قاتل تلاش کیے، کیا آپ نے ماڈل ٹائون کے قاتل تلاش کیے، کیا آپ نے نوازشریف کی بیماری تلاش کرلی؟،
خوف سے کوئی عمران خان کا ساتھ نہیں چھوڑے گا۔بابر اعوان نے کہا کہ کچھ لوگ پارٹی چھوڑ کر جا رہے ہیں، تحریک انصاف کو نہ تقسیم کیا جاسکتا ہے نہ مانس ون، 90دن کے بعد بھی حکومتیں ابھی بیٹھی ہوئی ہیں، کارکن عمران خان کو باہر نکلنے سے روکتے ہیں، وہ نہیں رکتے، اداروں کی ذمہ داریاں ہوتی ہیں اور عزت لوگوں کی ہوتی ہے، نگران حکومتیں مسلسل آئین توڑ رہی ہیں، آئین توڑنا غداری ہے، ہم اس عمل کو چیلنج کررہے ہیں، عمران خان واپس آرہا ہے۔
