لاہور( این این آئی)وزیر اعظم محمد شہباز شریف کی زیر صدارت اجلاس ہوا جس میں اسلام آباد کیپٹل ٹیریٹری میں مفت آٹے کی فراہمی کا جائزہ لیا گیا ۔اجلاس کو بتایا گیا کہ مفت آٹا اسکیم پنجاب، خیبر پختونخوا ہ اور اسلام آباد میں جاری ہے جس سے اہل خاندانوں کی بڑی تعداد مستفید ہو رہی ہے۔اجلاس کو مزید بتایا گیا کہ

اسلام آباد میں مفت آٹے کے حصول کو بہتر بنانے کے لیے مفت آٹا مراکز کی تعداد بڑھائی جا رہی ہے۔اجلاس کے شرکا ء سے گفتگو کرتے ہوئے وزیر اعظم نے کہا کہ رمضان کے دوران غریب طبقے کی مشکلات میں جہاں تک ممکن ہو سکے کمی کیلئے حکومت اقدامات کر رہی ہے۔انہوں نے کہا کہ مفت آٹے کی فراہمی کے عمل میں بہتری لانے کے لیے خود شہروں کا دورہ کر رہا ہوںِلاہور،قصور اور سرگودھا کے بعد دیگر شہروں میں آٹے کی فراہمی اور معیار کا جائزہ لوں گا۔وزیر اعظم نے ہدایت کی کہ ایسے اہل افراد جو بینظیر انکم سپورٹ پروگرام کے ساتھ رجسٹرڈ نہیں اور اس وجہ سے مفت آٹا حاصل نہیں کر پا رہے ان کی فوری رجسٹریشن یقینی بنائی جائے،آٹا تقسیم پوائنٹس پر نادرا اور بینظیر انکم سپورٹ پروگرام رجسٹریشن کیلئے اپنے کائونٹرز فوری قائم کریں۔انہوں نے مزید ہدایت کی کہ کوئی بھی مستحق شخص جو مفت آٹے کے مرکز پر آتا ہے اسے آٹا لازمی ملنا چاہیے اور اس حوالے سے متعلقہ ادارے تمام یقینی اقدامات کریں۔اجلاس میں وفاقی وزیر داخلہ رانا ثنا اللہ،وفاقی وزیر اطلاعات و نشریات مریم اورنگزیب، مشیر وزیر اعظم احد چیمہ،سابق اراکین قومی اسمبلی طارق فضل چوہدری،انجم عقیل اور متعلقہ اعلی سرکاری افسران نے شرکت کی۔

موضوعات:وزیر اعظم