اسلام آباد (مانیٹرنگ ڈیسک )چیئرمین تحریک انصا ف و سابق وزیراعظم عمران خان کی گرفتاری کیلئے پولیس کا آپریشن جاری ہےتاہم پی ٹی آئی کارکنوں کی جانب سے سخت مزاحمت جاری ہے، کارکنوں کی جانب سے پولیس پر پتھراؤ کیا جارہاہے۔ زمان پارک لاہور میں پولیس نے

پی ٹی آئی کارکنوں کو منتشر کرنے کیلئے ربڑ کی گولیوں کااستعمال شروع کر دیا۔پولیس کی جانب سے پی ٹی آئی کارکنوں کو منتشر کرنے کیلئے آنسو گیس کی شیلنگ اور واٹرکینن کا استعمال کیا جارہا ہے، جس کی ویڈیو سوشل میڈیا پر وائرل ہو رہی ہے،پی ٹی آئی کارکنوں کو کہتے ہوئے سنا جا سکتا ہے کہ پولیس کی جانب سے سیدھی فائرنگ کی جارہی ہے ۔ دوسری جانب چیئرمین تحریک انصاف عمران خان کے ناقابل ضمانت وارنٹ گرفتاری جاری ہونےکے بعد اسلام آباد پولیس کی ٹیم لاہور پولیس کی بھاری نفری کے ہمراہ گزشتہ روز سے زمان پارک پر موجود ہے جہاں اسے پی ٹی آئی کارکنان کی جانب سے شدید مزاحمت کا سامنا ہے۔نجی ٹی وی جیو نیوز کے مطابق کئی گھنٹے گزر جانے کے بعد بھی اسلام آباد پولیس زمان پارک سے عمران خان کو اب تک گرفتار نہ کرسکی، زمان پارک کے اردگرد پولیس کی اضافی نفری تعینات کردی گئی ہے جس نے علاقے کو مکمل طور پر گھیر رکھا ہے جب کہ قصور ،گوجرانوالا اور شیخوپورہ سے پولیس کی بھاری نفری بھی پہنچ گئی ہے، زمان پارک میں پنجاب رینجرز کو بھی طلب کرلیا گیا ہے۔زمان پارک میں پولیس کی جانب سے آنسو گیس کی شیلنگ کی جارہی ہے، متعدد شیل عمران خان کی رہائش گاہ کے اندر بھی گرے ہیں، واٹر کینن کا استعمال بھی کیا جارہا ہے، پی ٹی آئی کارکنوں کی جانب سے پولیس اور رینجرز پر پتھراؤ کیا جارہا ہے، پتھراؤ سے پولیس اہلکاروں سمیت رینجرز اہلکار بھی زخمی ہوئے ہیں۔اسپتال ذرائع کے مطابق پولیس اور کارکنوں کے درمیان جھڑپوں میں

اب تک 64 افراد زخمی ہوئے ہیں، زخمیوں میں ڈی آئی جی آپریشنز اسلام آباد شہزاد بخاری بھی شامل ہیں، زخمیوں میں 54 پولیس اہلکار اور 8 شہری شامل ہیں، 51 پولیس اہلکار سروسز اسپتال اور 3 میو اسپتال میں

ہیں۔پی ٹی آئی کارکنان کی جانب سے پیٹرول بم بھی پھینکے جارہے ہیں، زمان پارک کے قریب ٹرانسفارمر پھٹنے سے دھماکا ہوا ہے، ٹرانسفارمر مبینہ طور پر پیٹرول بم پھینکے جانے سے پھٹا ہے۔

عوام پر سیدھی فائرنگ، ربڑ کی گولیاں
pic.twitter.com/9LrFhHWVMv

— Imran Khan (@ImranRiazKhan) March 15, 2023