کراچی(آئی این پی)کراچی پولیس آفس (کے پی او) پر حملے کی تفتیش میں انکشاف ہوا ہے کہ واقعے کے وقت عمارت میں 25 افراد موجود تھے جنہوں نے حملے کے حوالے سے مزید انکشافات کیے ہیں۔
تفتیشی حکام کے مطابق تمام افراد کے بیانات لے لییگئے ہیں، جس کے مطابق عمارت میں داخل ہونے کے بعد حملہ آوروں نے لفٹ پرگرنیڈ پھینکا جس سے عمارت کی لفٹ ناکارہ ہوگئی، حملے کے وقت زیادہ تر افراد پہلی منزل پر موجود تھے، فائرنگ کے بعد تمام افراد عمارت کی دوسری منزل کی طرف بھاگے، دوسری منزل پر دہشت گردوں اور عملے کا سامنا بھی ہوا۔تفتیشی حکام کا کہنا ہیکہ حملہ آوروں نے عملے کو کمرے کے اندر رہنے کا اشارہ بھی کیا، اسی دوران حملہ آور کے پی او کے کوریڈور میں موجود رہے، دہشت گردوں نے عملے کے کمرے میں جانے کے بعد دروازوں پر فائرنگ کی، دہشت گرد مختلف کمروں کے باہر عملے کو آوازیں بھی دیتے رہے۔تفتیشی حکام کے مطابق دہشت گرد سیڑھیوں سے اوپری منزل کی طرف چلتے رہے، ممکنہ طور پر حملہ آوروں کا ہدف چوتھی منزل پر پہنچنا تھا، عمارت کی چوتھی منزل پر ایڈیشنل آئی جی کراچی کا دفتر بھی موجود ہے۔
