اسلام آباد (این این آئی)عوامی مسلم لیگ کے سربراہ و سابق وزیر داخلہ شیخ رشید نے کہا ہے کہ میرے گھر میں ڈکیتی ڈالی گئی ہے،ڈاکو پولیس کے روپ میں چیزیں لے گئے، ان سے کہتا ہوں یہ چیزیں واپس کردیں ورنہ میں ان کیخلاف مقدمہ درج کرائوں گا،ایف سے معاہدے کے باوجود ملک ڈیفالٹ ہونے کا خطرہ ہے،

اس سے بچنے کا حل شفاف الیکشن ہیں،آدھا سامان جیل چھوڑ کر آیا ہوں عمران خان سے پہلے گرفتاری دوں گا، ابھی کہوں تو اڈیالہ جیل پر قبضہ ہوجائے۔لال حویلی میں کارکنان سے خطاب کرتے ہوئے شیخ رشید نے کہا کہ یہ عمران خان کو جیل میں ڈالنا چاہتے ہیں، میں اپنا آدھا سامان جیل میں چھوڑ کر آیا ہوں، عمران خان سے پہلے گرفتاری دوں گا اور ابھی کہوں تو اڈیالہ جیل پر قبضہ ہوجائے۔انہوں نے وزیر خزانہ اسحاق ڈار پر تنقید کرتے ہوئے کہا کہ ایک ڈریکولا کہتا تھا میں آئوں گا ڈالر 200کا ہوجائے گا، اس کا باپ بھی یہ نہیں کرسکتا، آئی ایم ایف سے معاہدے کے باوجود ملک ڈیفالٹ ہونے کا خطرہ ہے، ڈیفالٹ سے بچنے کا ایک ہی حل ہے اور وہ شفاف الیکشن ہے۔شیخ رشید نے (ن) لیگ کی چیف آرگنائزر کو مخاطب کرتے ہوئے کہا کہ مریم بی بی آپ کا بیانیہ تو گھر میں نہیں مانا جارہا، آپ پہلے اپنے شوہر کو تو اپنے ساتھ ملالو، اگر حکومت تمہاری نہیں تو جرات کرو اور نام لو۔