کراچی(این این آئی)پیٹرولیم مصنوعات کی بڑھتی قیمتوں نے شہریوں کو گاڑیاں فروخت کرنے پر مجبور کردیا ہے۔کراچی کے شو رومز مالکان کے مطابق ڈالرکی قلت کی وجہ سے گاڑیوں کی درآمد بند ہے جس کی وجہ کاروبار ختم ہوگیا اور فروخت نہ ہونے کے برابر ہے۔ابترصورتحال کی وجہ سے پریشان کار ڈیلرزنے بتایاکہ 20 شو رومز بند ہوگئے ہیں شہری بھی گاڑیاں بیچ رہے ہیں جبکہ روزانہ 8 سے 10 افراد گاڑی بیچنے آتے ہیں۔انہوں نے مزید کہا کہ ایل سیز نہ کھلنے کی وجہ سے مینوفیکچرنگ پلانٹس بند ہوگئے گاڑیوں کی پیداوار بھی کم ہوگئی ہے۔ کار ڈیلر ایم فہد کے مطابق گاڑیوں کی فروخت نہ ہونے کے برابر ہے۔اعداد و شمار کے مطابق جولائی 2022 سے جنوری 2023 تک ایک ہزار سی سی والی گاڑیوں کی مجموعی پیداوار 10 ہزار836 اور فروخت 10 ہزار126 رہی ہے۔