لاہور(این این آئی)وزیراعلی پنجاب چودھری پرویز الٰہی کی اعتمادکا ووٹ لینے میں کامیابی پرپاکستان مسلم لیگ (ن)کے قائد نواز شریف اور چیف آرگنائزر مریم نواز نے پارٹی کی صوبائی قیادت سے شدید ناراضی کا اظہار کیا ہے جبکہ نوازشریف نے معاملے پر مفصل رپورٹ طلب کر لی ہے۔ذرائع کے حوالے سے بتا یا ہے کہ
مسلم لیگ (ن) کی قیادت اعتماد کے ووٹ میں پی ٹی آئی اتحاد کو حاصل ہونے والی کامیابی پر جماعت کے صوبائی ذمہ داران سے ناراض ہے اوراستفسار کیا گیا ہے کہ پارٹی قیادت کو تو آگاہ کیا گیا تھا کہ تحریک انصاف کے کم از کم 7ناراض اراکین پی ڈی ایم سے رابطوں میں ہیں،ناراض اراکین کیسے ووٹنگ کے لئے پہنچ گئے، انہیں مینج کیوں نہیں کیا جا سکا۔بتایا گیا ہے کہ نواز شریف نے اس معاملے پر تفصیلی رپورٹ مرتب کر کے بھجوانے کی ہدایت کی ہے۔نواز شریف سے وفاقی وزیر داخلہ و مسلم لیگ (ن)پنجاب کے صدر رانا ثنا اللہ کا رابطہ ہوا ہے جس میں ساری صورتحال پر تبادلہ خیال کیا گیا۔ رانا ثنا اللہ نے پارٹی قائد کو پنجاب اسمبلی کی تحلیل روکنے کے معاملے پر دستیاب آئینی و قانونی آپشنز پر بریفنگ دی۔نواز شریف نے ہدایت کی ہے کہ پنجاب اسمبلی کی ممکنہ تحلیل روکنے کے لئے ہر ممکن اقدام اٹھائے جائیں اور اس کے لئے پیشگی تیاریاں شروع کی جائیں۔نواز شریف کی رانا ثنا اللہ کو پاکستان پیپلز پارٹی کے شریک چیئرمین آصف علی زرداری سے بھی مزید مشاورت کرنے کی ہدایت کی گئی ہے۔ایک نجی ٹی وی کے مطابق رانا ثنا اللہ نے نواز شریف کو اعتماد کے ووٹ کے معاملے پر ابتدائی رپورٹ پیش کرتے ہوئے مریم نواز کی فوری وطن واپسی کی تجویز دی ہے۔ انہوں نے کہا کہ مریم نواز فوری وطن واپس نہیں آتیں تو پارٹی کو سیاسی طو رپر نقصان ہو سکتا ہے۔
