لاہور ( این این آئی) پاکستان تحریک انصاف کے چیئرمین و سابق وزیر اعظم عمران خان نے مزید آڈیولیکس کی روک تھام کے لئے اہم قدم اٹھا تے ہوئے لاہور میں اپنی رہائشگاہ زمان پارک کی ازسرنوچیکنگ کا فیصلہ کرلیا۔ نجی ٹی وی کے مطابق عمران خان کی جانب سے آڈیو

اورویڈیو ڈیوائسزچیک کرنے کیلئے اسپیشل برانچ کی ٹیم زمان پارک بلوائی گئی ہے ۔خصوصی ٹیم عمران خان کی رہائشگاہ کے تمام کمروں میں خفیہ آڈیو اور ویڈیو ڈیوائسز تلاش کررہی جبکہ گھر میں لگے سی سی ٹی وی کیمروں کی بھی مکمل چیکنگ کی جائے گی۔خیال رہے کہ 16دسمبر کو عمران خان کی اہلیہ بشری بی بی اور نگران بنی گالہ انعام خان کی مبینہ آڈیو سامنے آگئی تھی۔ آڈیو میں بشری بی بی سوال پوچھتی سنائی دے رہی ہیں کہ انعام خان آپ نے اصفر کو تصویریں کھینچنے کا کہا تھا؟ گھر میں باہر سے جو چیزیں آئیں ان کی تصویریں کیوں کھینچنی؟ گھر کے اندر آنے والی چیز کی کون تصویر کھینچتا ہے۔اس سے قبل 8دسمبر کو بھی تحریک انصاف کے رہنما زلفی بخاری اور سابق وزیراعظم عمران خان کی اہلیہ بشری بی بی کی مبینہ آڈیو سامنے آگئی تھی۔ بشری بی بی مبینہ طور پر ذلفی بخاری سے کہتی ہیں خان صاحب کی کچھ گھڑیاں ہیں جو انہوں نے کہا ہے کہ آپ کو بھیج دوں، تاکہ آپ انہیں بیچ دیں، وہ گھڑیاں خان صاحب کے زیر استعمال نہیں۔