اسلام آباد(آن لائن) پی ٹی آئی رہنما فواد چودھری نے سینیٹر اعظم سواتی کو گرفتار کرکے کوئٹہ منتقل کرنے پر عدلیہ اور ججز کو اپنی سخت تنقید کا نشانہ بنایا ہے۔ سماجی رابطوں کی ویب سائٹ ٹوئٹر پر جاری بیان میں سابق وفاقی وزیر نے کہا کہ اعظم سواتی کی کوئٹہ منتقلی پاکستانی عدالتوں کے انسانی حقوق ریکارڈ پر ایک اور داغ ہے۔ 75 سال کے بوڑھے سینیٹر اور وکیل کو بے عزت کیا جا رہا ہے۔فواد چودھری نے بلوچستان پولیس کے ہاتھوں اعظم سواتی کی گرفتاری اور بعد ازاں کوئٹہ منتقلی کے معاملے پر ٹوئٹ کرتے ہوئے مزید کہا کہ عدالتیں پاکستان کی تاریخ کو مزید داغ دار کرنے میں پیش پیش ہیں۔ جانے کب جج صاحبان احساس کریں گے کہ اللہ نے انہیں کس قدراہم ذمے داریوں سے نوازا ہے۔