اسلام آباد(آن لائن)پنجاب اسمبلی کو بچانے اور مرکز میں تحریک انصاف کو ٹف ٹائم دینے کیلئے سابق صدر آصف زرداری ایک بار پھر متحرک ہوگئے ہیں اور انہوں نے سپیکر راجہ پرویز اشرف کو تحریک انصاف کے اراکین کے مزید استعفے قبول کرنے کے حوالے سے اہم ہدایات جاری کی ہیں جبکہ دوسری طرف مسلم لیگ ن کا

ایک اعلیٰ سطح کا وفد بھی سابق صدر آصف زرداری سے ملا ہے۔اس وفد میں سینئر وفاقی وزراء رانا ثناء اللہ ،خواجہ سعد رفیق اور ایاز صادق شامل تھے۔زرداری ہاؤس میں ہونے والی اس ملاقات میں پنجاب اسمبلی بچانے اور پرویز الٰہی کے خلاف عدم اعتماد کی تحریک لانے کے حوالے سے مختلف امور اور آپشنز پر تبادلہ خیال ہوا۔ذرائع کے مطابق اس ملاقات میں پنجاب حکومت کی کرپشن بھی عوام کے سامنے لانے کافیصلہ کیا گیا۔سابق وزیراعلیٰ عثمان بزدار کے دور میں پنجاب میں جو کچھ ہوتا رہا اس کی بھی تفصیلات عوام کے سامنے لائی جائیں گی جبکہ پنجاب اسمبلی کو بچانے کے لئے آصف زرداری اپنے تمام سیاسی تجربے اور آپشنز کو استعمال میں لائیں گے۔اس بارے میں (ن) لیگ ان پر پہلے ہی اعتماد کر چکی ہے۔آصف زرداری نے یقین دلایا ہے کہ وہ پنجاب اسمبلی کو تحلیل ہونے سے بچانے کیلئے اپنا بھرپور کردار ادا کریں گے۔دوسری طرف تحریک انصاف کے قومی اسمبلی میں اراکین کے استعفے منظور کرنے سے متعلق انہوں نے راجہ پرویز اشرف کو بلا کر بعض ہدایات بھی جاری کی ہیں۔ذرائع کا کہنا ہے کہ آئندہ چند روز میں پنجاب حکومت کی تبدیلی اور عدم اعتماد کی تحریک کے حوالے سے اہم فیصلہ سامنے آجائے گا جس میں مرکزی کردار آصف زرداری کا ہی ہوگا۔

موضوعات:آصف زرداری