لاہور، اسلام آباد ( این این آئی) لاہور ہائیکورٹ نے تحریک انصاف کے چیئرمین و سابق وزیر اعظم عمران خان کی توشہ خانہ ریفرنس میں نااہلی فیصلے کے خلاف درخواست پر فل بینچ تشکیل دے دیا۔تین رکنی فل بینچ کی سربراہی چیف جسٹس ہائیکورٹ جسٹس محمد امیر بھٹی کریں گے جبکہ بینچ کے دیگر ارکان میں جسٹس عابد عزیز شیخ اور جسٹس ساجد محمود سیٹھی شامل ہیں۔

این اے 95 کے ووٹر جابر عباس نے اظہر صدیق ایڈوکیٹ کی وساطت سے درخواست دائر کر رکھی ہے۔درخواست گزار کے مطابق الیکشن کمیشن عدالت نہیں اور کسی کو نااہل کرنے کا اس کے پاس اختیار نہیں ہے اس لیے عدالت الیکشن کمیشن کی جانب سے توشہ خانہ ریفرنس میں عمران خان کی نااہلی کا فیصلہ کالعدم قرار دے۔واضح رہے کہ گزشتہ سماعت پر لاہور ہائیکورٹ کے جسٹس محمد ساجد محمود سیٹھی نے درخواست گزار کی معاملے پر لارجر بینچ تشکیل دینے کی استدعا منظور کرتے ہوئے لارجر بینچ کی سفارش کے ساتھ فائل چیف جسٹس کو بھجوا ئی تھی ۔دوسری جانب الیکشن کمیشن نے عمران خان کی کامیابی کا نوٹیفکیشن روکنے کے معاملے پر کیس کی سماعت 13 دسمبر تک ملتوی کر دی۔چیف الیکشن کمشنر کی سربراہی میں تین رکنی بینچ نے کیس کی سماعت کی۔درخواست گزار مسلم لیگ (ن) کے رکن قومی اسمبلی علی گوہر بلوچ الیکشن کمیشن میں پیش نہیں ہوئے، درخواست گزار کے جونیئر وکیل پیش ہوئے۔

معاون وکیل نے الیکشن کمیشن کو بتایا کہ درخواست گزار لاہور میں ہیں، اس وجہ سے پیش نہیں ہو سکے۔چیف الیکشن کمشنر نے کہا کہ درخواست گزار کو بتادیں آئندہ سماعت پر پیش نہ ہوئے تو آپ کی درخواست مسترد کر دیں گے جس کے بعد الیکشن کمیشن نے کیس کی سماعت 13 دسمبر تک ملتوی کر دی۔واضح رہے کہ علی گوہر بلوچ پی ٹی آئی چیئرمین عمران خان کی ضمنی الیکشن میں کامیابی کا نوٹیفکیشن رکوانے کے لیے الیکشن کمیشن درخواست دائر کی ہے۔(ن )لیگی ایم این اے توشہ خانہ ریفرنس کے درخواست گزار بھی ہیں، انہوں نے الیکشن کمیشن میں عمران خان کی کامیابی کا نوٹس جاری کرنے سے متعلق درخواست جمع کرائی۔