لاہور (این این آئی) پاکستان تحریک انصاف کے چیئرمین و سابق وزیر اعظم عمران خان نے کہا ہے کہ ظلم کا یہ دور ختم ہونے والا ہے، آنے والے وقتوں میں اظہار رائے کی آزادی ہو گی، امپورٹڈ سرکار عوام اور اداروں کو آمنے سامنے کھڑا کرنا چاہتی ہے مگر قوم سب چوروں کو جان چکی ہے۔ گزشتہ روز تحریک انصاف کے

چیئر مین عمران خان کے زیر صدارت زمان پارک میں ہونے والے اجلاس میں سیاسی صورتحال، لانگ مارچ سمیت اہم امور پر تبادلہ خیال کیا گیا۔ اجلاس میں تحریک انصاف کے وائس چیئرمین و سابق وفاقی وزیر خارجہ شاہ محمود قریشی، سابق وفاقی وزیر خزانہ اسد عمر، سابق وفاقی وزیر اطلاعات فواد چودھری، سابق وزیر مملکت فرخ حبیب، ڈاکٹر شیریں مزاری، اسد قیصر، علی زیدی، زلفی بخاری، پرویز خٹک، علی امین گنڈا پور، مراد سعید،عامر کیانی، بابر اعوان، شفقت محمود، اعجاز چودھری، اعظم سواتی، شاہ فرمان، علی اعوان، شبلی فراز، اسلم خان، افتخار درانی، کرنل (ر) عاصم شریک ہوئے۔پارٹی ذرائع کے مطابق تحریک انصاف کے اجلاس میں راولپنڈی کال اور موجودہ سیاسی صورتحال پر گفتگو کی گئی جبکہ ملک کے معاشی بحران اور اس سے پیدا ہونے والی صورتحال پر بھی غور کیا گیا۔ذرائع کے مطابق چیئرمین عمران خان سے ایف آئی اے کی مبینہ انتقامی کارروائیوں کا نشانہ بننے والے کارکنان نے بھی ملاقات کی۔کارکنان نے عمران خان کو بریفنگ دیتے ہوئے کہا کہ ایف آئی اے کی انتقامی کارروائیاں جاری ہیں۔نوٹسز بھیج کر ہمیں ہراساں کیا جارہا ہے۔جس پر عمران خان نے کہا کہ ظلم کا یہ دور ختم ہونے والا ہے، آنے والے وقتوں میں اظہار رائے کی آزادی ہو گی۔عمران خان نے کہا کہ امپورٹڈ سرکار عوام اور اداروں کو آمنے سامنے کھڑا کرنا چاہتی ہے۔

موضوعات:عمران خان