لاہور ( این این آئی) انٹرنیشنل کرکٹ کونسل ٹی ٹونٹی ورلڈ کپ سے متعلق کی جانے والی پہلی پیشگوئی غلط ثابت ہو گئی۔ویسٹ انڈیز کرکٹ ٹیم کے جارح مزاج بلے باز کرس گیل نے ٹی ٹونٹی ورلڈ کپ کے فائنل کے لیے آسٹریلیا اور ویسٹ انڈیز کی ٹیموں کو فیورٹ قرار دیا تھا۔کرس گیل کی پیشگوئی کو ان ہی کے ملک کی ٹیم نے غلط ثابت کر دیا۔بھارتی میڈیا کو انٹرویو دیتے ہوئے جارح مزاج بلے باز کرس

گیل نے کہا تھا کہ مجھے لگتا ہے ٹی ٹونٹی ورلڈ کپ کا فائنل میزبان آسٹریلیا اور ویسٹ انڈیز کے درمیان کھیلا جائے گا۔ہوبارٹ میں کھیلے گئے اس میچ میں شکست کے بعد ویسٹ انڈیز ٹی ٹونٹی ورلڈ کے سپر 12 مرحلے میں کوالیفائی نہ کرسکی اور 2 مرتبہ کی چمپئن ٹیم پہلے مرحلے میں ہی باہر ہوگئی۔واضح رہے کہ ٹی ٹونٹی ورلڈ کپ کے پہلے رائونڈ کے 11 ویں میچ میں آئرلینڈ نے ویسٹ انڈیز کو 9 وکٹ سے شکست دی تھی۔
دوسری جانب جنوبی افریقہ کے سابق کرکٹر عمران طاہر نے کہا ہے کہ پاکستان کرکٹ ٹیم آئی سی سی ایونٹس اچھا کھیلتی ہے، پاکستان کو دفاعی چمپئن آسٹریلیا، بھارت، انگلینڈ اور جنوبی افریقہ کے ساتھ ٹاپ میں رکھوں گا۔انہوں نے ایک انٹرویو میں کہا کہ پاک بھارت میچ ایک بہت بڑا میچ ہوتاہے، ہم بھی پاکستان اور بھارت کے میچ سے لطف اندوز ہوتے ہیں۔پریشر والے میچ جو اپنے اعصاب پر قابو پائے گا وہی اچھا کھیلے گا، دبائووالی صورت حال میں کم غلطیاں کرنے والی ٹیم میچ جیتے گی۔عمران طاہر نے کہا کہ پاکستان اور بھارت کی ٹیموں میں ورلڈ کلاس کھلاڑی شامل ہیں، فرق صرف یہ ہو گا کہ جو ٹیم صورتحال کے مطابق دبائو برداشت کرے گی وہ جیتے گی۔

عمران طاہر نے بھارت کے خلاف کھیلے جانے والے اپنے میچ کے تجربے کے بارے بتایا کہ میں نے بھی بھارت کے خلاف میلبرن میں ورلڈ کپ کا ایک پریشر والا میچ کھیلا تھا۔انہوں نے کہا کہ اسٹیڈیم میں چار پانچ ہزار تماشائی جنوبی افریقہ کے جبکہ نوے پچانوے ہزار بھارتی تماشائی تھے، ہم ہار تو گئے لیکن میں نے پریشر کی صورتحال میں اچھا کرنے کے کوشش کی۔