اسلام آباد (مانیٹرنگ ڈیسک /این این آئی)قومی کرکٹ ٹیم کے کپتان بابر اعظم نے پاکستان کی جانب سے سب سے زیادہ ٹی 20 انٹرنیشنل میچز جیتنے والے کپتان کا اعزاز حاصل کرلیا۔قومی ٹیم کی کپتانی میں پاکستان نے اب تک 49 ٹی 20 انٹرنیشنل میچز کھیلے ہیں۔بابر اعظم نے 30 میچوں میں پاکستان کو کامیابی دلوائی

جب کہ 14 میچوں میں شکست ہوئی۔قبل ازیں انگلینڈ کے خلاف دوسرے ٹی ٹوئنٹی میچ میں بابراعظم نے 66 گیندوں کا سامنا کیا اور 110 رنز بنائے ان کی اننگز میں پانچ چھکے اور 11 چوکے شامل تھے۔ اس سے قبل بابر اعظم نے جنوبی افریقہ کے خلاف 122 رنز کی اننگز کھیلی تھی، بابراعظم نے انگلینڈ کے خلاف میچ کے دوران 8 ہزار ٹی ٹوئنٹی رنز مکمل کرکے ویرات کوہلی کو پیچھے چھوڑ دیا، بابراعظم نے 218 اننگز میں یہ سنگ میل عبور کیا، بابراعظم ویسٹ انڈیز کے کرس گیل کے بعد دوسرے تیز ترین بیٹر بن گئے ہیں۔ ویرات کوہلی نے 243 اننگز کھیل کر یہ سنگ میل عبور کیا تھا۔دوسری جانب  پاکستان کرکٹ ٹیم کے کپتان بابر اعظم نے ناقدین کو دلچسپ انداز میں جواب دیتے ہوئے کہا کہ میں کون ہوتا ہوں تنقید کرنے والوں کو کچھ کہنے والا۔ نیشنل اسٹیڈیم میں انگلینڈ کے خلاف تاریخی فتح کے بعد بابر اعظم نے پریس کانفرنس کرتے ہوئے کہا کہ ہم میچ کی صورتحال کے مطابق حکمت عملی بنا کر اترے اور کامیاب ہوئے۔انہوں نے کہاکہ تنقید اچھا کرنے پر بھی ہوتی ہے اور اگر اچھا نہ کریں تو پھر بھی ہوتی ہے۔پاکستان ٹیم کے کپتان نے کہاکہ جب غلطیاں کرتے ہیں تو اس پر بات کر کے دور کرنے کی کوشش کرتے ہیں۔انہوں نے کہا کہ زیادہ وقت نہیں ملتا، کوشش ہوتی ہے کہ

مسائل پر بات کر کے حل کیا جائے۔بابر نے کہاکہ کنڈیشنز اور ہدف کے حساب سے اپنی منصوبہ بندی کرتے ہیں اور اسی حساب سے اس پر عملدرآمد کرتے ہیں۔ جب ان سے ساتھی کھلاڑی رضوان کے ساتھ ساتویں سنچری پارٹنر شپ سے متعلق سوال کیا

تو انہوں نے جواب دیا کہ ہمارا تال میل بہت اچھا ہے، کبھی کبھی بغیر کال کے بھی رنز لے لیتے ہیں۔ انہوں نے ٹیم میں حسنین کی شمولیت سے متعلق کہا کہ ہم مختلف کمبی نیشن کرنے کی کوشش کر رہے ہیں

اور آگے بھی کرتے رہیں گے۔ خیال رہے کہ پاکستان نے انگلینڈ کو سات میچوں کی سیریز کے دوسرے ٹی ٹوئنٹی میچ میں 10 وکٹوں سے ہرا کر کامیابی سمیٹی اور سیریز میں مہمان ٹیم کی برتری ختم کرتے ہوئے اسے 1-1 سے برابر کردیا۔