کراچی(این این آئی)ملک میں آٹے کی قیمتیں تاریخ کی بلند ترین سطح پر پہنچ گئیں، کراچی کے شہری ملک میں سب سے مہنگا آٹا خریدنے پر مجبور ہیں۔

تفصیلات کے مطابق ملک میں آٹے کی قیمتیں تاریخ کی بلند ترین سطح پر پہنچ گئیں، کراچی میں آٹے کا 20 کلو کا تھیلا 2140 روپے تک کی ریکارڈ سطح پر پہنچ گیا۔ملکی تاریخ میں پہلی بار آٹا 107 روپے فی کلو تک ہوگیا، ایک ہفتے میں آٹے کا 20 کلو کا تھیلا 180 روپے تک مہنگا ہوا۔ کراچی کے شہری ملک میں سب سے مہنگا آٹا خریدنے پر مجبور ہیں، پنجاب اور خیبر پختونخواہ کے مقابلے میں کراچی میں آٹے کا تھیلا 1160 روپے تک مہنگا ہے۔حیدر آباد میں آٹے کے تھیلے کی قیمت میں 140 روپے، کوئٹہ میں 120 روپے، خضدار میں 100 روپے، سکھر میں 40 روپے اور لاڑکانہ میں 20 روپے اضافہ ہوا۔ادارہ شماریات کا کہنا ہے کہ حیدر آباد میں آٹے کے 20 کلو تھیلے کی قیمت 2 ہزار 80 روپے، خضدار میں 1950 روپے، کوئٹہ اور لاڑکانہ میں 1920، سکھر میں 1800 روپے، پشاور، بنوں، اسلام آباد اور راولپنڈی میں 980 روپے ہے۔پنجاب کے بڑے شہروں میں بھی آٹے کا تھیلا 980 روپے تک ہے۔